"Карпенко билан тушунмовчилик бўлди, "Нефтчи" билан келишувга эришгандик, кейин билсам..." ёхуд Дилшод Жўраев "Қизилқум"га нима учун ўтганини айтди

Иқтидорли ярим ҳимоячи Дилшод Жўраев “Бунёдкор” клубини тарк этиб, “Қизилқум” жамоасига кўчиб ўтди. Ҳолбуки, у иккинчи даврани бошқа клубда бошлаши ҳам мумкин эди.

Қизиғи, унинг янги жамоасидаги дебют ўйини собиқ клуби – “Бунёдкор”га қарши ўтди ва ғалаба қозонди. Куни кеча Жўраев Sports.uz учун бир қатор масалалар бўйича муносабат билдирди.

“Бунёдкор”га қарши ўйин ўзимга ҳам қизиқ бўлди”

- Ўйин ўзимга ҳам қизиқ бўлди. Чунки “Қизилқум”даги дебют учрашувим собиқ клубим – “Бунёдкор”га қарши ўтди. Табиийки, ғалабадан хурсандмиз. Бу бизнинг иккинчи даврадаги илк ғалабамиз бўлди. Мен бу учрашувда захирадан майдонга тушдим. Бироз машғулотларни қолдиргандим, спорт формамни тиклашга ҳаракат қиляпман. “Қизилқум”га ўтганимдан мақсад жамоага ёрдам бериш ва совринли ўринлар учун курашишда ўз ҳиссамни қўшмоқчиман. Жамоа жуда аҳил. “Бунёдкор” ҳам яхши қаршилик кўрсатди. У ердаги футболчиларим ўзимни укаларим. Собиқ жамоамга кейинги учрашувларда омад тилайман.

“Бунёдкор”дан кетишимнинг сабаблари бор”

- “Қизилқум”даги дебютим “Бунёдкор”га қарши бўлишини кутгандим. Учрашувдан аввал мураббий бугундан бошлайсан, деб айтганди. Бундан олдин ўйнамаганим сабаби бироз тайёр эмасдим. Боя айтдим, “Бунёдкор” билан учрашув жуда қизиқарли бўлди. Мен учун бу клуб бегона эмас. Биринчи даврада 70-80 фоиз ёшлар билан биринчи даврани 7-ўринда тугатдик. Бу яхши натижа бўлди. Жамоа билан катта ҳажмдаги ишни бажардик, ҳамма меҳнат қилди. У ерда асосан ёшлар эди. Катталардан асосан мен, Даврон ака Эргашев ва Суҳроб Султонов. Менимча, биринчи даврада ёшларимизни ортимиздан эргаштира олдик. “Бунёдкор”дан кетишимнинг айрим сабаблари бор. Яхши таклиф ва совринли ўринлар учун Осиё Чемпионлар лигасида қатнашишни хоҳлаётган жамоадан таклиф бўлгани сабабли “Бунёдкор” билан келишган ҳолда кетишга қарор қилдим.

“Бош мураббийга кетганим яхши дедим”

- Аслида йил бошида ҳам олдимда яхши вариантлар бўлганди. Ўзим “Бунёдкор” клубидан чиққанман, бу жамоага меҳрим баланд бўлгани боис раҳбарият томонидан тушган таклифни қабул қилганман. Ўша пайтдаги бош мураббий Шуҳрат ака Мақсудов асосан ёшлар, фақат 2-3 та ёши катта ўйинчилар бўлади, ортинглардан эргаштирасизлар деб айтган ва бу менинг яхши кўрган клубим бўлгани учун ҳам келгандим. Виктор Карпенко бош мураббий бўлганидан сўнг очиқ айтишим мумкинки, тактика, ўйин услуби жиҳатидан бироз тушунмовчиликлар бўлди. Шундан кейин бош мураббийга кетганим яхши, ёшлар ўйнасин, совринли ўринлар учун курашадиган клубга бораман деб айтдим.

“Левченкога миннатдорчилик билдираман”

- “Нефтчи”дан спорт директори ва мураббий қўнғироқ қилди. Шу фурсатдан фойдаланиб, Виталий Левченкога ўз миннатдорчилигимни билдираман. У билан келишувга эришгандик. Бу клубда икки кун бўлдим. Кейин билсам уларни ПФЛдан қарздорлиги бор экан. ПФЛ клубга чеклов қўйибди. Шуни ҳисобига Левченко билан дўстона хайрлашдик ва “Қизилқум”га ўтиб кетдим.

“Худди ўз жамоамга келгандек бўлдим”

- “Қизилқум”ни танлашимда биринчи ўринда раҳбарият, мураббий ва футболчиларнинг ишончи. У ердаги кўплаб ўйинчилар билан “Бунёдкор”, АГМКда ва терма жамоада бирга ўйнаганман. Бу ерга келишимга футболчилар ҳам туртки бўлди. Келишимни хоҳлашди. Олдимизга қўйилган мақсадни бажаришга бор кучимиз билан ҳаракат қиламиз. Жамоа мени жуда яхши қабул қилди. Санжар Шоаҳмедов, Салим Мустафоев, Олег Зотеев, умуман барча футболчилар билан муносабат яхши ва худди ўз жамоамга келгандек бўлдим. Клубда барчаси тажрибали йигитлар.

“Илк суҳбатдаёқ Лазаревич яхши таассурот қолдирди”

- Никола Лазаревич билан илк кўришганимдаёқ яхши таассурот қолдирди. Ажойиб инсон экан. Кўнгли очиқ, одамгарчилик тарафидан ҳам зўр. Футболчиларни тўғри тушунади. Биринчи чақиришганида “Ўзбекистон” меҳмонхонасида учрашдик. Футбол ўз йўлига, аммо биринчи ўринда ўзаро ҳурмат, муносабат ва ишонч устун. Шу нарсалар суҳбатимизда кўринди. Улар ҳам талабларини айтишди ва буни бажаришга бор кучимни ишга соламан.