Касильяс бугунги финалда иштирок этади

"Реал", "Порту" ва Испания терма жамоаларининг собиқ дарвозабони Икер Касильяс ЖЧ-2022 ёпилиш маросимида иштирок этади.

Касильяс Аргентина ва Франция ўртасидаги жаҳон чемпионати кубогини "Лусаил" стадионига олиб киради, деб хабар берди Marca. Илгари Икер ЖЧ-2018 очилиш маросимида иштирок этганди. Унинг вазифаси ўшанда ҳам шунга ўхшаш эди. 

Франция плей-офф босқичида Польша (3:1), Англия (2:1) ва Марокаш (2:0) жамоаларини мағлуб этди. Аргентиналиклар эса Австралия (2:1), Нидерландия (2:2, 4:3 пен.) ва Хорватияни (3:0) енгиб, энг сўнгги босқичга етиб келди.

Эслатиб ўтамиз, Франция амалдаги жаҳон чемпиони ҳисобланади. Ушбу жамоалар Россияда ўтган мундиалда нимчорак финалда ўзаро тўқнаш келган эди.