Катта чиқимга кўниккан “Ливерпуль” суперюлдуз учун 150 миллион евро санайди

Англиянинг амалдаги чемпиони “Ливерпуль” бош мураббийи Арне Слот ўтган ёз ўз жамоасига бир неча кучли ўйинчиларни қўшиб олди. Бу трансферларга клуб рекорд сумма – 500 миллион еврога яқин маблағ сарфланди.

Шунга қарамай, жорий мавсумнинг сўнгги учрашувлари “қизиллар” таркиби ҳали ҳам мукаммал эмаслигини кўрсатиб қўйди.

Fichajes нашрининг маълум қилишича, “Ливерпуль” яна бир супертрансферга бел боғлаган. Клуб хўжайинлари “Бавария”дан Майкл Олисени олиш учун 150 миллион евро харажат қилишга тайёр.

Арне Слот учун Олисе стратегик аҳамиятга эга. Бош мураббий бу ўйинчи яқин келажакда жамоа тўпурари Муҳаммад Салоҳнинг ўрнини босишига ишонмоқда.

Мюнхен клуби билан 2029 йилнинг ёзигача давом этадиган шартномага эга 23 ёшли футболчини Европанинг бир неча гранд клублари ўз сафига қўшиб олишга ҳаракат қилмоқда.