Катта йўқотишга учраган “Реал” Осиёдан ёрдам кутяпти

“Реал” янги трансферга эҳтиёж сезмоқда. Мадридликлар оғир жароҳат туфайли мавсумнинг қолган қисмини ўтказиб юборадиган Эдер Милитао ўрнига бошқа ҳимоячи олиши керак.

Football Espana ва AS каби нашрларнинг маълум қилишича, мадридликлар яна Эмерик Лапорт номзодига қайтди. “Қироллик клуби” мутасаддилари “Ан-Наср”да ўйнаётган испан футболчисини ёзги трансферлар вақтида ҳам ўз сафига қўшиб олмоқчи бўлганди.

“Реал” 30 ёшли футболчидан саудияликлар билан шартномани бир томонлама бекор қилиб, клубга эркин агент мақомида келишини истаяпти. Агар Лапорт амалдаги шартномани тўхтатса, “Реал” қишки трансферлар ойнаси очилишини кутмасдан, уни исталган вақтда ўз сафига қўшиб олиши мумкин.

Лапорт жорий мавсумда барча турнирларда 15 маротаба майдонга тушиб, ҳимоядаги вазифаларини бажаришдан ташқари, рақиблар дарвозасини уч маротаба ишғол қилишни ҳам уддалади.

Тажрибали ўйинчининг саудияликлар билан амалдаги шартномаси 2026 йилнинг ёзигача давом этиши белгиланган.