Кеча футболчи эди, бугун эса раҳбар!

Ҳужумчи Носир Отақўзиевни ишқибозлар яхши танишади. «Нефтчи»даги фаолияти орқали катта футболга кириб келган ва сўнг бир қатор клубларда тўп сурган фарғоналик футболчининг фаолиятида яқинда туб бурилиш бўлди. Аслида у жорий йилни ҳам футболчи сифатида бошлаганди ва «Нефтчи» жамоасида фаолият кўрсатиб келаётганди. Лекин кейинчалик воқеалар ривожи ўзгариб, Отақўзиев Фарғона вилоят футбол ассоциациясига вице-президент лавозимига тайинланди. Шу тариқа, у бирданига футболчилик фаолиятини якунлаб, раҳбарлик лавозимини эгаллади. Энди у Фарғона футболини ривожлантириш учун ишга киришди. Бу қандай рўй берди дея қизиқаётгандирсиз-а? Куни кеча Отақўзиев билан боғланиб, бир қатор масалаларда суҳббатлашдик.

- Тўғри, 2019 йилда ҳам фаолиятимни футболчи сифатида бошлагандим, - дея гап бошлади, Отақўзиев. - Ҳеч бўлмаса яна бир йил футбол ўйнаб, кейин тугатаман деган мақсадим бор эди. Ҳамма билади, менинг «Қўқон-1912» билан шартномам бор эди. Мавсум бошида эса 3-4 футболчини «Нефтчи»га ёрдам бериш учун жўнатишди. Бизни ўша пайтдаги бош мураббий Баҳром Ҳайдаров ҳам таклиф этганди. Мақсад эса жамоани яна Суперлигага қайтариш эди. Лекин «Нефтчи» молиявий томондан қийналди. Бунинг орасида эса Ҳайдаров жамоадан кетиб қолди. Бунинг орасида эса мен жароҳат олдим. Барибир ёш ҳам ўз сўзини айтар экан. Олдингидек ўйнаш осон эмасди. Натижада «Нефтчи» раҳбарлари билан гаплашиб, фаолиятимни тугатишга қарор қилдим. Биласиз, мен учун «Қўқон-1912» қадрдон жамоам ҳисобланади. Шу боис улар мени ишга чақиришди. Клуб раҳбари Бахтиёр ака Толипов мени Азиз Тўхтабоевга ёрдамчи қилиб таклиф қилди. Биласиз, Риштонда катта ободонлаштириш ишлари олиб бориляпти. У ерда эса менинг хусусий ошхонам ҳам бор. Натижада қурилиш ва бунёдкорлик ишлари бошлаб юборилганидан кейин бир ойча Риштондаги ишларим билан қолиб кетдим. Вилоят ҳокими Шуҳрат Мадаминович Ғаниев эса доимий равишда Риштонга келиб, у ерда амалга оширилаётган ишлар билан яқиндан танишиб юрди. Биз бир-биримизни танирдик. Табиийки, Риштондаги ободонлаштириш ишларини кузатаётган чоғида кўришиб қолдик. Гапдан-гап чиқиб, ҳозир қаердасан, нима қиляпсан деб сўраб қолди. Қаерда ўқиганим билан қизиқишди. Шундан сўнг мени Фарғона вилояти футбол ассоциациясининг вице-президенти лавозимига тайинлашди. Шундай қилиб, бу ердаги ишимни бошлаб юбордим. Куни кеча Тошкентга чақиртиришди ва Ўзбекистон футбол ассоциациясининг биринчи вице-президенти Равшан Эрматовнинг қабулида бўлдим. Шунингдек, спорт вазири билан учрашдик. Тошкентда «Чарм тўп» мусобақаси ўтказилди ва у ерга Марғилондан жамоамиз ҳам қатнашди.

- Эрматов билан учрашувингиз қандай ўтди?

- Равшан Эрматов футболимиз савиясини янада юқорига кўтариш учун ҳаракат қиляпти. У футболимизнинг ичидаги ҳаммасини билади. Собиқ футболчиларнинг вилоят футбол ассоциацияси раҳбариятига тайинланаётганини ҳам алоҳида айтмоқчиман. Масалан, Шуҳрат Мирҳолдиршаев Наманган футбол ассоциациясида, Асқар Жадигеров Тошкет вилояти футбол ассоциациясида, Андижонда Бекзод Каримов, Самарқандда эса Илҳом Юнусов. Равшан ака билан ўзаро суҳбатимиз давомида эса футболимизни кўтариш кераклигини, бунинг учун мавжуд муаммоларни ҳал қилиш мумкинлигини ва бундай ишларни футболнинг ичида юрган инсонларгина ҳал қила олишини айтиб, бир-биримизни қўллаб-қувватлашимиз муҳимлиги ҳақида таъкидлади. Шунингдек, академияларга, ёшлар спортига эътиборни ошириш зарурлигини, Суперлигада ҳам Фарғонадан жамоа бўлиши муҳимлигига ҳам эътибор қаратди.

- Сизнинг ҳали бу лавозимда ишга киришганингизни кўпчилик билмайди. Чунки аксарияти футболчи Носир Отақўзиев сифатида билишади. Кеча майдонда ўйнаётгандингиз, бугун эса раҳбарлик лавозимидасиз. Энди зиммангиздаги масъулият янада ошди. Боиси, сиз бутун вилоят футболи учун жавоб берасиз. Бундай катта ишга тайёрмидингиз?

- Тўрғи, мен учун янги иш десам бўлади. Лекин ўзимнинг ҳам фирмам борлиги учун ташкилий ишлардан ҳам оз-моз хабарим бор. Шунинг учун бу ишни янгилик демаган бўлардим. Лекин мендан олдин бу ерда раҳбар бўлиб ишлаган Расул Йўлдошевни олиб қолдим. Ҳаким Жўраевич ҳам ёрдам беради. Улар билан биргаликда катта мақсадлар сари ишга киришдик. Менинг ҳали улардан ўрганадиган нарсаларим кўп. Одам қилган ишни одам қилади.

- Бу ерга келгач, янги мақсад ва ғояларингиз қандай? Дастлабки ишни нимадан бошладингиз?

- Футбол академияларига бориб, директорлар, футболчилар билан гаплашдик. Майдонларни кўздан кечирдик. Етарли даражада шароитларни яратиб беришга ҳаракат қиламиз. Тизимли муаммоларни ўрганиб чиқяпмиз ва уларни бартараф этиш йўлларини ўйлаб топамиз.

- Фарғона футболи тарбияланувчиси сифатида фаолиятингизнинг катта қисмини шу вилоятда ўтказгансиз. Айтмоқчиманки, Фарғона футболидаги ҳолатни ипидан-игнасигача билсангиз керак. Таассуфки, охирги йилларда Фарғона футболи орқага кетди. Мисол учун «Нефтчи» қуйи лигага тушиб кетиши оқибатида энди Суперлигада бу шаҳардан жамоа йўқ. Фикрингизча, нима сабабдан Фарғона футболи пасайиб кетди?

- Биринчидан авлодлар алмашинуви юз берди. Иккинчидан, асосий ҳомийга келадиган бўлсак, ҳали ишга тушиб, жадаллашиб кетгани йўқ. Шу боис маблағ ажратилмади. «Нефтчи» мана шундай оралиққа тушиб қолди. Яъни, молиявий томондан қийинчиликларга дуч келишди. Ҳамма билади, «Нефтчи»нинг тарихи узун ва чуқур. Равшан Эрматов ҳам «Нефтчи»нинг олдинги мавқеини қайтариш муҳимлигини айтди. Муаммо эса асосан молиявий масалага бориб тақалади. «Истиқлол»га келсак, уларда ҳеч қандай муаммо йўқ. Суперлигага чиқиш учун астойдил кураш олиб боришяпти. Шу боис уларда аниқ мақсад бор. Бу жамоага ҳам эътибор қаратяпмиз. Вилоят ҳокими эса футболга бефарқ эмас. Шунча ишлари бўлса-да, мени чақиртириб футболга янада кўпроқ эътибор қаратиб, ишлашимизни тайинлаяпти. «Қўқон-1912», «Истиқлол»нинг қайд этаётган натижаларидан ҳам хабардор бўлиб турибди. Худо хоҳласа, «Нефтчи»даги ишлар ҳам яқин бир-икки ойда яхши бўлиб кетади.

- Фарғонада футболни кўтариш учун тўсиқ бўлаётган катта муаммо сифатида нимани айтган бўлардингиз?

- Энг катта муаммо деб ёшлар билан ишлайдиган мураббийларнинг етишмаслигини айтган бўлардим. Борларини ҳам билим ва савиясини ошириш, махсус ўқув-курсларида ўқиб, малака оширишлари муҳим. Ёшлар мураббийлари барибир қаердадир футбол ўйнаган бўлиб чиқишмайди, асосан иккинчи лигаларда ўйнашган. Республикадаги болалар билан ишлайдиган тажрибали мутахассислар келиб, уларга дарс ўтишлари, малакаларини оширишлари учун семинарлар ташкил қилиш керак. Уй қуриш учун эса аввало унинг пойдевори мустаҳкам бўлиши лозим. Шундай экан, футболчининг бу йўлга кириши аввало болалар футболидан бошланади. Афсуски, бизда айнан болалар билан ишлаш бўйича етарли кадрларнинг етишмаслигини кўрдим. Қолган масалаларни ҳам ҳал қилса бўлади. Масалан, майдонлар етарли, тажрибали мутахассислар ҳам бор. Ҳакамларимиз ҳам етарли. Болаларни спортга жалб қилиш ишлари ҳам кенг миқёсида олиб борилмоқда. Равшан Эрматов билан яна учрашганимизда ушбу масалага ҳам ечим топамиз деб умид қиламан. Шунингдек, футбол мактаблари ва академияларига алоҳида руҳшуносларни ҳам бириктириш ҳақида ўйламоқдаман. Ёшларни тушкунликдан олиб чиқиш учун эмас, балки уларга юртга бўлган муҳаббатни, ватанпарварлик, инсонийлик қадриятларини ошириш юзасидан шуғулланиши ҳам мумкин. Ахир болаларда онг, ақл, тафаккур, маданият деган тушунчалар ҳам шаклланиб бориши лозим. Шунинг учун ҳам руҳшунос керак. Бунинг учун ёшлигиданоқ тарбиялаб бориш муҳим саналади. Натижада эртага улар футболчи бўлиб етишмаган тақдирда ҳам ватанга манфаати тегадиган инсон бўлиб етишишлари мумкин.

- Носир ака, футболчилик фаолиятингизга назар ташлайдиган бўлсак, қандай хотиралар қолган?

- Футболчи бўлиб элга танилдим. Худога шукрки, соғлигим жойида. Юрт кўрдим. Ватаннинг қадрини билдим. Шу билан бирга кўплаб ютуқларга эришдим. Уларнинг орасида энг катта ютуғим сифатида 2011 йили «Насаф» билан ОФК Кубогидаги муваффақиятимизни айтишим мумкин. Ўшанда биринчи Президентимиз томонидан бизни машиналар билан тақдирлашган. 2006 йили «Нефтчи»нинг тўпурари бўлдим. 2010 йилги мавсумда эса Олмалиқда ҳам тўпурарликка эришдим. Юрий Саркисян, Миржалол Қосимов, Игорь Шквирин каби мураббийлар билан ишладим. Буларнинг ўзбек футболида алоҳида ўрни бор. Фаолиятимда қаттиқ жароҳат олганим йўқ. Шукрки, футбол ўйнаб ёмонлик кўрмадим. Футболчи бўламан деб ният қилганларга шуни айтмоқчиманки, футболни деб ўқишни ташлаб қўймасликлари керак. Масалан, мен иккита институтни битирганман. Жисмоний тарбия билан иқтисод йўналишида таҳсил олганман ва ўқиш учун вақт топа олганман. Футболчи бўлгандан кейин барибир ақлини ҳам ишлатиши керак. Футболда ўзига яраша ҳисоб-китоб ҳам керак бўлади. Агар сиз тез фикрлай олмайдиган бўлсангиз, футбол ўйнай олмайсиз. Майдонда шундай пайтлар бўладики, сиз қисқа сонияларда фикр қилиб, тўғри йўлни танлашингиз ва тўпни шеригингизга узата олишингиз лозим. Бунинг учун ақлни ишлатиш керак бўлади.

- Аслида ўзингизда мураббийлик қилиш режангиз бормиди?

- Мураббийлик қилишга хоҳишим ҳам, режам ҳам бор эди. Ҳаттоки, «С» лицензиясига ҳам эга эдим. Яқинда эса «В» учун лицензияга ҳужжатларни топшириб тургандим. Аммо кейинчалик воқеалар ривожи ўзгариб кетди. Нима бўлганда ҳам мен яна футболда қолдим. Вилоят ҳокимининг ташаббуси билан яна футболда ишлашда давом этяпман. Чиндан ҳам вилоятимиздаги футболни яхши биламан. Мураббийлар ва футболчиларнинг ҳаммаларини танийман. Шу боис уларга йўл-йўриқ кўрсатиб, тўғри ва керакли маслаҳатларни ҳам айтишим осон.