Келаси йил ММА бўйича янги лига очилади!

Bellator ва Strikeforce нинг собиқ президенти Скотт Кокер 2027 йилнинг биринчи чорагида ўзининг дебют турнирини ўтказадиган янги лига билан аралаш жанг санъатига расман қайтди.

Душанба куни Кокер ва унинг матчмейкер Рич Чою ҳамда медиа-менежер Питер Левиндан иборат жамоа матбуот анжумани ўтказиб, промоушен "Ki MMA" деб номланишини эълон қилди. Бу ерда "Ki" японча сўз бўлиб, "руҳ, ақл ва қувват" деган маънони англатади. Лигадаги жанглар рингда бўлиб ўтади, бу япон яккакураш анъаналарига яна бир ишора ҳисобланади.

Бундан ташқари, ушбу турнирда россиялик афсонавий спортчи Фёдор Емеляненко ҳам иштирок этиши ҳақида ҳам хабарлар тарқаляпти.

Шунингдек, Скотт Кокер 32 нафар жангчи иштирокида ярим енгил вазн тоифасида Гран-при ўтказишни режалаштирмоқда. Саккизтадан спортчи тўртта минтақа: Шимолий Америка, Жанубий Америка, Осиё ва Европа номидан иштирок этади. Ҳар бир ҳудуддан биттадан вакил халқаро босқичнинг ярим финалига йўл олади.

Ташкилот турнирларни ўтказишни режалаштираётган шаҳарлар ва мамлакатлар орасида Сан-Хосе, Дублин, Будапешт, Бразилия, Япония, Жанубий Корея, шунингдек, Италия ва Франция номлари келтирилган.