Кейн: "Бу турнирдаги энг яхши ҳужумкор ўйинимизни намойиш этдик"

Англия терма жамоаси сардори Харри Кейн Жаҳон чемпионати 1/16 финалида Конго ДР устидан қозонилган 2:1 ҳисобидаги ғалабага муносабат билдирди.
⠀
Эслатиб ўтамиз, англияликлар 75-дақиқагача ҳисобда ортда бораётган бўлса-да, Кейннинг дубли эвазига учрашувни ўз фойдасига ҳал қилди ва 1/8 финалга йўл олди.
⠀
"Ажойиб ҳиссиёт. Жуда оғир ўйин бўлди. Биз яхши ташкиллашган ва кучли жамоага қарши майдонга тушдик. Сув ичиш учун берилган биринчи танаффусдан кейин ўйинимизни кучайтирдик. Рақиб дарвозабони бир нечта ажойиб сейвларни амалга оширди. Аммо сабр қилишда давом этсангиз, имкониятлар албатта келади.
⠀
Бизнинг жамоада исталган футболчи ҳал қилувчи қаҳрамонга айланиши мумкин. Бундай баҳсларда энг муҳими — сабрни сақлаш. Сўнгги икки учрашувимиз бир-бирига ўхшади. Босим кучайди, аммо биз ўз услубимизга содиқ қолдик.
⠀
Менимча, бу турнирдаги энг яхши ҳужумкор ўйинимизни намойиш этдик. Энди ҳар бир баҳсда ғалаба қозониш шарт. Ўйиндан кейин жамоадошларимга бу лаҳзалардан завқланишни айтдим. Баъзан Англия терма жамоаси футболчилари сифатида ғалабаларни етарлича нишонламаймиз. Кейинги босқичга чиққан эканмиз, бунинг қадрига етишимиз керак", — деди Кейн.