Клопп "Ливерпуль"нинг Европа лигасидан чиқиб кетгани ҳақида: "Камбек қилмоқчи эдик, бироқ жуда қийин эди"

Европа лигасининг чорак финалидан ўрин олган жавоб учрашувлари ўз ниҳоясига етди. 

Дастлабки ўйинда 3:0 ҳисобида мағлуб бўлган "Ливерпуль" иккинчи баҳсда "Аталанта" дарвозасига битта гол урди. Иккала ўйин натижасига кўра, бергамоликлар ярим финалга йўл олди. 

Мазкур учрашувдан сўнг англияликлар бош мураббийи Юрген Клопп ўз фикрлари билан ўртоқлашди. 

"Биз ўзимиз учун вазифани қийинлаштириб юборганимиз аниқ эди. Аммо йигитлар кўрсатган истак ва куч билан намойиш этган ўйинлари менга жуда ёқди. Бу улар учун ажойиб беллашув бўлди. 

Қийин беллашувда иштирок этдик, баъзи вазиятларда шошиб қолганимиз ҳам рост. Камбек қилмоқчи эдик, бироқ жуда қийин эди. 

Мусобақани тарк этдик, мендаги туйғулар ҳозир аралаш. Финалга, Дублинга боришни истагандик. Лекин бу амалга ошмади, ҳозир "Ливерпуль"да фақат битта мусобақа қолди ва бор кучимизни ўша ерда ғолиб бўлиш учун сарфлаймиз", - деди германиялик мутахассис.