Конте Хойлунд ва Мактоминей нега захирада қолганини очиқлади

"Наполи" А Сериянинг 7-турида "Торино"га (0:1) ютқазди. "Манчестер Юнайтед"дан ижарага олинган ва неаполликлар сафида 6 та ўйинда 4 гол урган даниялик ҳужумчи бу беллашувда майдонга тушмади. Шунингдек, ярим ҳимоячи Скотт Мактоминей ҳам ўйнамади.

Антонио Конте бунга шундай изоҳ берди:

"Улар биз билан келишди, чунки биз уларнинг ўйнашини хоҳлагандик. Пайшанба куни Мактоминейнинг тўпиғи шикастланиб, олтита чок қўйишга тўғри келди. Бу жуда нохуш ҳолат. Кеча уни тайёрлашга ҳаракат қилдик, лекин у таваккал қилишни истамади. Мен ҳеч кимни мажбурлай олмайман. Расмус терма жамоадан жуда чарчаган ҳолда қайтди. Илгари у бунчалик кўп ўйнамаган эди, кейин эса биз ва Дания учун тўхтовсиз ўйнай бошлади. Унинг тўрт бошли мускули бироз чўзилган эди. Ҳар уч кунда ўйналса, ҳатто шундай кичик муаммо ҳам жиддийлашиб кетади. Бошқа имкониятлар бор экан, таваккал қилишнинг ҳожати йўқ эди. Бизнинг юртда "Оқсоқ отдан кўра соғлом от афзал" деган гап бор", - дея таъриф бериб ўтди неаполликлар мутахассиси.