Кроос: "Роналдуга етарлича ҳурмат кўрсатишмаяпти"

"Реал"нинг собиқ ярим ҳимоячиси Тони Кроос Саудия Арабистони чемпионатида Криштиану Роналдуга нисбатан муносабатни танқид қилди.

Аввалроқ португалиялик юлдуз "Ал-Рияд" ва "Ал-Иттиҳод"га қарши ўйинларни ўтказиб юборгани хабар қилинган эди. Маълумотларга кўра, Роналду Саудия Арабистони Суверен жамғармаси томонидан "Ан-Наср" бошқарилишидаги айрим қарорлардан норози бўлган. Унинг фикрича, клубга чемпионлик курашида тўсиқлар юзага келтирилмоқда. Шунингдек, айрим ходимларга маошлар кечиктирилгани ҳам норозилик сабабларидан бири бўлган.

Бугун "Ан-Наср" қарздорликларни бартараф этганидан сўнг Роналду норозилик ҳаракатини тўхтатиши маълум қилинди. Унинг шанба куни "Ал-Фатех"га қарши ўйинда майдонга қайтиши кутилмоқда.

"Саудия Арабистони чемпионати ғалати ҳодиса. Криштиану Роналду келгунига қадар ҳеч ким бу лига ҳақида эшитмаган эди, энди эса улар ўзларини жаҳон харитасига қўшган инсонга нисбатан ҳурматсизлик қилмоқда.

Ишончим комилки, агар Криштиану эртага кетса, бу лига ўз жозибасини тўлиқ йўқотади", — деди Кроос.