![](https://static.sports.uz/crop/2a953673c37557bfe0dd2d10dcb6a7ca.jpg)
Кураш бўйича Осиё чемпионатида қочқинлар жамоаси ҳам иштирок этади
Хабарингиз бор, жорий йилнинг 6-11 июнь кунлари Эрон Ислом Республикаси пойтахти Теҳрон шаҳрида кураш бўйича эркаклар ва аёллар ўртасидаги Осиё чемпионати бўлиб ўтади.
Ушбу Осиё чемпионатида 20 та давлатдан 250 нафарга яқин энг сара полвонлар иштирок этиши кутилмоқда.
Аҳамиятли жиҳати, ўн учинчи бор ўтказилаётган катталар ўртасидаги мазкур қитъа биринчилигида илк марта қочқинлар жамоаси ҳам иштирок этади. Шу ўринда таъкидлаш жоиз, қочқинлар бу ижтимоий, сиёсий ёки бошқа жиддий сабабларга кўра, ўз ватанидан чиқиб кетган инсонлар сифатида тушинилади. Уларда асосий ватанлари номидан халқаро спорт мусобақаларида иштирок этиш имконияти мавжуд эмаслиги сабабли, Халқаро Олимпия қўмитаси томонидан қочоқлар жамоаси сифатида қатнашиши таъминлаб келинмоқда.
Кураш бўйича халқаро мусобақалар тарихида ҳам бу илк бор юз бермоқда.
Қочқинлар жамоалари тўғрисидаги қарор 2023 йил Ашхабодда бўлиб ўтган IKA Конгресси ва 2024 йил Дубай шаҳрида ўтказилган IKA Бошқарув қўмитаси йиғилишларида муҳокама қилинган ва тегишли нормативлар қабул қилинган.
Эндиликда қочқинлар жамоаси Халқаро Кураш ассоциацияси тақвимидаги барча мусобақаларда иштирок этиши мумкин. Бунда жинс тоифасидан ташқари ирқи, миллати ва ижтимоий келиб чиқишлари ҳисобга олинмайди. Жамоа Халқаро Кураш ассоциацияси томонидан координация қилинади.
Халқаро Олимпия қўмитаси стандартлари асосида жамоанинг байроғи ва мадҳияси сифатида Халқаро Кураш ассоциациясининг байроқ ва мадҳиясидан фойдаланилади.
Теҳрон гиламларида қочоқлар жамоаси сафида 5 нафар аёл куч синашади.
Фикрлар