Kurtua Belgiya terma jamoasida o‘ynashdan bosh tortdi

Madridning "Real" jamoasi darvozaboni Tibo Kurtua futbol bo‘yicha Belgiya terma jamoasi tarkibida Millatlar ligasida maydonga tushmaslikka qaror qildi, deya xabar bermoqda HLN.

Ma’lumotlarga ko‘ra, tajribali darvozabon ushbu qarorni terma jamoa bosh murabbiyi Mark van Bommel bilan suhbatdan so‘ng qabul qilgan. Murabbiy unga asosiy tarkibda doimiy o‘rin kafolatlay olmagan.

Kurtua terma jamoa bilan munosabatlaridagi muammolarni avval ham boshidan kechirgan. U Domeniko Tedesko bosh murabbiylik qilgan davrda kelib chiqqan mojaro tufayli milliy jamoadagi faoliyatini vaqtincha to‘xtatgan edi. Faqat 2025 yil qishida, Moskva "Spartak" jamoasining sobiq murabbiyi bo‘lgan Tedesko ishdan bo‘shatilgandan so‘ng, yana terma jamoaga qaytgan.

Manbaga ko‘ra, bu safar ham masala asosiy tarkib atrofida kelib chiqqan. Kurtua Millatlar ligasi mavsumi davomida Belgiya terma jamoasiga yordam bermasligini ma’lum qilgan, ammo Yevropa chempionati saralash uchrashuvlarida ishtirok etishga tayyorligini aytgan.

"Men Millatlar ligasi mavsumi davomida terma jamoa uchun o‘ynamaslikka qaror qildim. Faqat bosh murabbiyda jarohatlar bilan bog‘liq jiddiy muammolar yuzaga kelsa, istisno tarzida chaqirilishim mumkin. Men Yevropa chempionati saralash bahslarida qatnashishga tayyorman. Bu Van Bommel uchun ham yaxshi variant, lekin u menga asosiy tarkibdagi o‘rinni kafolatlay olmasligini aytdi", — degan Kurtua.

Tibo Kurtua hozirda 34 yoshda. U Belgiya terma jamoasi safida 115 ta o‘yin o‘tkazgan. Darvozabon terma jamoa bilan birga uchta jahon chempionatida (2014, 2018, 2022) va ikkita Yevropa chempionatida (2016, 2020) ishtirok etgan.