Лазизбек Мулложонов: Энди жангда кўрамиз, ким кучли эканлигини...

Тошкентдаги "Ҳумо арена"да бокс бўйича эркаклар ўртасидаги жаҳон чемпионати давом этмоқда.

-92 кг вазн тоифасида Лазизбек Мулложонов грузиялик Гиорги Тчигладзе билан рингга кўтарилди. Ҳамюртимиз жангда 5:0 ҳисобида ғалабага эришди.

Ушбу муваффақиятдан сўнг Мулложонов ўз фикрлари билан ўртоқлашди.

- Жанг ўйлаганимдан ҳам жуда зўр ўтди. Жангдан жангга очилиб боряпмиз. Рақибим жисмоний томондан анча бақувват. Лекин мураббийларимиз қўйган тактикамиз билан ишлаб, ғалабага эришдик. Икки раунд катта фарқ билан ютганим учун мураббийлар ортиқча ҳаракатсиз жангни якунлашимни айтишди.

Бу вазнга ҳали тўлиқ мослашдим, деб айта олмайман. Ҳозир шу жараён кечмоқда. Вазн ташлаш қийинчилик туғдирмади, десам озроқ ёлғон гапирган бўламан.

Аввал ҳам кейинги босқичдаги кубалик рақибим билан тўқнаш келишни жуда хоҳлаётганимни айтгандим. Энди жангда кўрамиз, ким кучли эканлигини, - деди Лазизбек Мулложонов.