Легионеримиз лигани тарк этмоқда. Мураббийнинг илтимоси ўтмади!

Беларусь олий лигасининг энг қудратли жамоаларидан бири – БАТЭ клуби матбуот хизмати ўзбекистонлик  легионер Шаҳбоз Умаров мамлакат чемпионатини тарк этишга қарор қилганини маълум қилди.

23 ёшли футболчи аслида “Пахтакор” тарбияланувчиси ҳисобланади. Бироқ, профессинонал ўйинчи сифатида АГМК жамоасида шакланган.

Шаҳбоз Умаров 2020 йилнинг бошида Олмалиқдан Беларусь чемпионатига кўчиб ўтган эди. “Энергетик-БГУ” жамоасида маҳоратини намойиш этиш орқали маҳаллий ва хорижий мухлису мутахассислар эътиборини қозонган.

Легионер сифатидаги дастлабки мавсумида ўзини кўрсатган Шаҳбоз Умаровни БАТЭ ўз сафига қўшиб олганди. Борисов жамоасидаги дебют мавсумида ҳам ҳамюртимиз муваффақиятли ўйнади ва қисқа вақт ичида етакчи ўйинчига айланди.

БАТЭ ўтган мавсум олдидан Шаҳбоз Умаров ёрдамида чемпионлик учун курашишни мақсад қилганди. Лекин мавсумолди тайёргарлик жараёнида истеъдодли футболчимиз жамоага янги тайинланган бош мураббий Александр Михайлов билан келиша олмай қолди.

Гап шундаки, бунгача ёшлар билан ишлаб ўрганган Михайлов ўртоқлик учрашувларидан бирида Шаҳбоз Умаровни бир неча бор ҳақорат қилди. Тажрибасиз мураббийнинг  бу қўпол муносабати жамоа етакчиси сифатида тўп тепаётган легионеримизга ёқмади ва у майдонни тарк этди.

Бу можаро оқибатида Михайлов Шаҳбоз Умаровни очиқчасига ўйнатмай қўйди. Ҳамюртимизнинг узр сўрагани ҳам вазиятни ўзгартирмади. Бош мураббийнинг қайсарлигидан ҳамма ютқазди. БАТЭ энг қимматбаҳо футболчисини йўқотди, Умаровнинг ёрдамисиз базўр учинчи ўринга илиниб қолди. Шаҳбознинг ўзи ярим йил футболдан четда қолиб кетди.

Ўтган йили ёзда Шаҳбоз Умаров ўйин амалиётига эга бўлиш учун Қозоғистоннинг “Ордабаси” жамоасига ижара асосида кўчиб ўтди. Ҳар қалай ҳамюртимизнинг қўшни мамлакат футболидаги илк мавсуми омадли кечди.

Шаҳбоз 2022 йилни Қозоғистон кубогидаги ғалаба билан якунлади.

Умаровнинг борисовликлар билан амалдаги шартномаси 2023 йилнинг 31 декабрига қадар тузилган. Лекин Шаҳбоз жамоа йиғинларида қатнашмаяпти ва бошқа чемпионатга ўтиши ҳақида клуб раҳбариятини огоҳлантирган. Ўйинчининг кетишини БАТЭнинг ҳозирги бош мураббийи Кирилл Альшевский ҳам тасдиқлади.

- Футболчи ўзи учун муҳим қарорни қабул қилиб бўлган ва у бошқа клубга ўтмоқчи. Мен уни олиб қолиш учун бир мураббий сифатида қўлимдан келган барча ишни қилдим. Лекин у бошқа чемпионатда, бошқа клуб шарафини ҳимоя қилиш фикридан қайтгани йўқ.

Табиийки, жамоага фойда келтиришга иштиёқи бўлмаган ўйинчини мажбуран олиб қолиш мантиққа тўғри келмайди.  Мен унинг қолишини истайман. Лекин иш у биз билан бўлмайдиган вазиятга қараб кетяпти. Биз уни олиб қолиш учун ҳамма нарса қилиб кўрдик, лекин танловни Умаровнинг ўзи амалга оширди, - деди Кирилл Альшевский.

Шаҳбоз Умаров бир неча жамоалар, хусусан, “Ордабаси” жамоаси билан музокара олиб бормоқда.

Яқинда Беларусь чемпионатини яна бир легионеримиз – ўтган мавсум қаҳрамони Бобур Абдухолиқов ҳам тарк этган эди. Бобур “Энергетик-БГУ” таркибида 26 та гол уриб, Беларусь чемпионатлари тарихида энг кўп тўп киритган легионерга айланди. Абдухолиқов  чемпионат кумуш медалидан ташқари, турнирнинг энг яхши футболчиси ва энг зўр тўпурари совринларига ҳам сазовор бўлди.