Легионеримиз муҳим учрашувда гол урди

Россия Миллий футбол лигасининг 18-турида ўзбекистонлик легионерлар – Вагиз Галиулин ва Бобир Давлатов иштирок этаётган “Нефтехимик” жамоаси энг йирик ҳисобда ғалаба қозонди.

Бу гал Нижнекамск жамоаси ўз майдонида “Краснодар-2” футболчиларини қабул қилди. Рақибдан ҳар томонлама устунлигини исботлаган “Нефтехимик” вакиллари ўйинда жавобсиз бешта тўп киритди.

Мезбонларнинг тўртинчи голига Вагиз Галиулин муаллифлик қилди. Ҳамюртимиз бу ўйинни захира ўриндиғида бошлади ва 46-дақиқада майдонга туширилди. Орадан ўн дақиқа ўтиб, Вагиз жаримадан оширилган тўпни краснодарликлар посбони Денис Адамов қўриқлаётган дарвозага жойлаб қўйди.

Бу ҳамюртимизнинг жорий мавсумдаги учинчи голи бўлди. Учрашувда Бобир Давлатов ҳам иккинчи бўлимни тўлиқ ўтказди.

Муҳим ғалабадан сўнг, очколари ҳисобини 34 тага етказган “Нефтехимик” мусобақа жадвалида бешинчи ўринни эгаллаб турибди. Миллий футбол лигаси пешқадамлари –   “Крилья Советов” ва “Нижний Новгород” жамоалари ҳисобида 39 тадан очко бор.

“Нефтехимик” кейинги тур учрашувини 1 ноябрь куни “Балтика” майдонида ўтказади.