Легионерларимизнинг финалдаги рақиби аниқ бўлди

Чимкентнинг “Ордабаси” жамоаси шарафини ҳимоя қилаётган Ўзбекистон миллий терма жамоаси аъзолари – Бобур Адухолиқов ва Шаҳбоз Умаров йил охирига бориб, ўз жамғармаларини яна бир соврин билан бойитиб қўйиши мумкин.

Маълумки, “Ордабаси” яқинда Қозоғистон кубогининг ярим финалида энг кучли жамоалардан ҳисобланган “Астана”ни енгиб, финалга чиққан эди.

Биринчи баҳсда пойтахтликлар қўли баланд келганди. Бироқ, Чимкентдаги жавоб ўйинида Шаҳбоз Умаров узоқ масофадан ажойиб гол уриб, жамоасини мағлубиятдан қутқариб қолди. Ғолибни аниқлаш учун ўтказилган қўшимча таймларда “Ордабаси” вакиллари ғалаба тўпини киритиб, финалга чиқди.

“Ордабаси”нинг финалдаги рақиби “Атирау” ва “Тобол” жамоалари ўртасидаги рақобатда аниқланди. Кустанайликлар ўз майдонида ўтказилган биринчи ўйинда минимал ҳисобда зафар қучган эди.

Рақиб майдонидаги баҳсда ҳам “Тобол” устунлик қилди. “Атирау” рақибга атиги  бир соат қаршилик қила олди. 60-дақиқада Иван Рогач бурчакдан узатилган тўпни боши билан дарвоза тўрига жойлади.

Ҳар икки учрашувда 1:0 ҳисоби билан ғалаба қозонган кустанайликлар финал учрашувида “Ордабаси”га қарши саф тортадиган бўлди.

Таъкидлаш жоизки, “Тобол”нинг финалгача етиб келишида яқинда жамоани тарк этган ўзбекистон легионер Игорь Сергеевнинг ҳам хизмати катта бўлган. Ҳамюртимиз саралаш босқичларида кустанайликларга ёрдам берган эди.

Қозоғистон кубогининг амалдаги соҳиби “Ордабаси” жамоаси ҳисобланади. Чимкентликлар ўтган йили финалда “Акжайик” жамоаси билан тўқнаш келиб, жуда мураккаб учрашувда қўшимча вақтда ғалаба тўпини киритиб, 5:4 ҳисобида зафар қучган эди.

Бу гал жамоасини финалга олиб чиққан Шаҳбоз Умаров Қозоғистон кубоги соҳиби ҳисобланади. Энди ҳамюртимизда бу совринни иккинчи маротаба қўлга киритиш имконияти бор. Қолаверса, Бобур Абдухолиқов ҳам биринчи марта Қозоғистон кубогини боши узра кўтариши мумкин.

Қизиқ факт бор. Шаҳбоз Умаров ҳали фаолияти давомида бирор мамлакат чемпионлигини қўлга киритмаган бўлса-да, кубок жамғариш бўйича ўзига хос натижа қайд этмоқда. 24 ёшли ҳужумкор футболчимиз фаолияти давомида АГМК жамоаси сафида Ўзбекистон кубоги, легионер сифатида БАТЭ жамоаси билан бирга Беларусь кубоги соҳиби ҳисобланади.

Шунингдек, жорий мавсумда “Ордабаси” Премьер-лига чемпионлиги учун ҳам асосий даъвогар ҳисобланади. Ҳозирча, чимкентликларнинг олтин медаль йўлидаги ягона рақобатчиси “Астана” жамоаси бўлиб турибди.

Шаҳбоз Умаров бу йил Премьер-лига ва кубок доирасидаги учрашувларда 19 марота майдонга тушиб, иккитадан гол ва ассист қайд этган.

Бобур Абдухолиқов “Ордабаси”даги дебют мавсумида мана шу икки мусобақада 20 та ўйин ўтказиб, олтита гол ва иккита голли узатма қайд этди.

“Ордабаси” ва “Тобол” ўртасидаги финал учрашуви шу йилнинг 4 ноябрь куни ўтказилиши белгиланган.

Ҳужумда Шомуродов ва Икарди!

Тўпурар легионеримизга қимматбаҳо рақобатчи келди!

Легионеримизнинг голи финалга йўл очди! Олдинда финал!