Lionel Messi urilmaydigan rekord o‘rnatib qo‘ydi

AQSh mezbonlik qilgan Amerika kubogi yana Argentina terma jamoasining g‘alabasi bilan yakunlandi.

Bosh sovrinni boshi uzra ko‘targan Lionel Messi urilmaydigan rekord qayd etdi. 37 yoshli futbolchi faoliyati davomidagi 45-sovrinni qo‘lga kiritdi.

Sovrin jamg‘arish bo‘yicha Lionel Messi 44 ta musobaqada g‘olib chiqqan braziliyalik Dani Alvesni ortda qoldirdi.

Bu borada uchinchi qatorda faoliyati davomida faqat “Al-Ahli” jamoasida to‘p tepgan misrlik yarim himoyachi Xossam Ashur qayd etilgan. U jami 39 ta sovringa ega chiqqan.

Lionel Messi Amerika kubogida to‘rtta uchrashuvda ishtirok etib, bittadan gol va golli pas muallifi bo‘ldi.