"Ливерпуль" Экитикенинг икки ҳафталик маошини ушлаб қолади

"Ливерпуль" Юго Экитикени "Саутгемптон"га қарши ўйинда қизил карточка олгани учун жаримага тортади. 

"Қизиллар" ҳужумчиси Англия лига кубоги доирасида иккинчи бўлимда захирадан майдонга тушди ва 53-дақиқада рақибни ушлаб, кейин тўпни тепиб юборгани учун огоҳлантирилди. 

85-дақиқада франциялик футболчи Кьезанинг узатмасидан унумли фойдаланди ва гол уриб, мерсисайдликларни 2:1 ҳисобида олдинга олиб чиқди. Голдан сўнг Экитике футболкасини ечиб, уни томошабинларга кўрсатди. Бош ҳакам Том Брамэлл унга иккинчи сариқ карточка кўрсатди. 

Қоидаларга кўра, Экитике четлатилганлиги сабабли АПЛ доирасида бўлиб ўтадиган "Кристал Пэлас"га қарши ўйинни ўтказиб юборади. 

"Daily Mail" хабарига кўра, футболчи интизоми ёмонлиги учун клуб томонидан жаримага тортилиши мумкин. Аниқ жазо тасдиқланмаган, аммо франциялик футболчининг икки ҳафталик маоши клуб томонидан ушлаб қолишини кутилмоқда.