“Ливерпуль” устози Муҳаммад Салоҳнинг келажаги бўйича саволга жавоб берди

“Ливерпуль” жорий мавсумда Англия чемпионлиги учун асосий даъвогар ҳисобланади. Жамоанинг пешқадамлик қилишида Муҳаммад Салоҳнинг ҳиссаси катта.

Шунга қарамай, мисрлик тўпурарнинг клубдаги келажаги мавҳум бўлиб турибди.

Жамоа бош мураббийи Арне Слот ўйинчи келажаги ҳақидаги саволга жавоб бериб, Салоҳ тўғри қарорга келишига умид билдирди.

- Агар дунёдаги бирортаси “бизга Муҳаммад Салоҳ керак эмас” деса, ҳайратдан ёқамни ушлаган бўлардим.

Бу футболчи катта тажрибага эга, ақл билан иш юритади. Салоҳ фаолияти давомида жуда кўп танловларни тўғри амалга оширган. Бу гал ҳам шундай қилишидан умидворман. У ўзи учун ҳам, биз учун ҳам ижобий қарорга келади, - деди Арне Слот.

32 ёшли ҳужумкор футболчи “Ливерпуль”да 2017 йилдан бери тўп тепиб келмоқда. Салоҳ 2012 йили Мисрдан Европага келганидан кейин “Базель”, “Челси”, “Рома” каби клубларда ҳам фаолият юритган.