"Локомотив" Бекободда биринчи даврадаги мағлубият учун жавоб қайтарадими?

25 сентябрь куни Coca-Cola Суперлиганинг 17-тур баҳсларига старт берилади. Шу куни Бекободнинг “Металлург” клуби ўз майдонида иккинчи даврани кетма-кет учта ғалаба билан бошлаган “Локомотив”ни қабул қилади.

Ёдингизда бўлса, ушбу жамоаларнинг биринчи даврада Тошкентда ўтказилган учрашувида бекободликлар жавобсиз учта гол уриб, ажойиб ғалабани қўлга киритишганди. Қизиқ, "Локомотив" энди Бекободда ўша мағлубият учун "Металлург"ни мағлуб эта олармикин?

Мазкур клублар ҳисоб бўйича 34-учрашувда майдонга тушишади. Катта устунлик “Локомотив” жамоаси томонида. Улар 18 марта “Металлург”ни мағлубиятга учратган бўлса, бекободликлар фақатгина 5 та ўйинда рақиби устидан ғалаба қозонган. 10 та беллашувда эса дуранг натижаси қайд этилган.

Жумладан, ўтган йили иккала даврада ҳам жамоалар бир очкодан бўлишиб олишган. Тўплар нисбати бўйича “Металлург” 25 та гол урган бўлса, “Локо” 55 бор рақиб дарвозасини ишғол қилган.

Эслатиб ўтамиз, “Металлург” – “Локомотив” баҳси 25 сентябрь куни соат 17:00 да бошланади.