"Локомотив"га қарши Олмалиқдаги ўйин АГМК учун муҳим аҳамият касб этади

Ўзбекистон кубоги "B" гуруҳининг илк турида АГМК ва "Локомотив" ўзаро куч синашади. Бўлажак баҳс жорий мавсум ҳисобидан Олмалиқликларнинг ўз уйидаги биринчи учрашувга айланади.

Ўзаро ўйинлар статистикасига кўра, барча мусобақалардаги ўтказилган жами 30 ўйинда "Локомотив" 18 ғалабани тантана қилган, АГМК эса 7 маротаба "темирйўлчилар"дан устун келган. Қолган 5 беллашувда ғолиб номи аниқланмаган. Тўплар нисбати: 56-37, "Локомотив" фойдасига.

Дисквалификация муддатини ўтаб бўлган АГМК вакиллари — Александр Касьян ва Шоҳруҳ Гадоев бўлажак учрашувда иштирок этишлари мумкин.

Ўйин бош ҳаками этиб Илья Ильин тайинланган. Ильин бунга қадар олмалиқликлар иштирокидаги бир учрашувни бошқарган ва унда "Машъал"га имконият бой берилганди. Бўлажак баҳс Қосимов шогирдлари учун Ильин бошқарувидаги иккинчи ўйинга айланади.

Ўйин 7 апрель куни Олмалиқдаги ОКМК спорт мажмуасида соат 18:00да бошланади.

АГМК клуби матбуот хизмати