Макс Холлоуэй – Чарльз Оливейра: Кутилмаларни оқламаган жанг!

Хабарингиз бор, бугун АҚШнинг Лас-Вегас шаҳрида "UFC 326" турнири бўлиб ўтди. Оқшомнинг марказий тўқнашувида америкалик Макс Холлоуэй ва Бразилия вакили Чарльз Оливейра BMF камари учун ўзаро октагонга кўтарилди. Тўлиқ 5 раунд давом этган қарама-қаршиликда Оливейра ҳакамларнинг якдил қарорига кўра зафар қучди.

Бироқ ушбу баҳс кутилмаларни оқламади. Ингилиз тилидаги учта сўзнинг қисқартмаси “Бошга бало жангчи” тариқасида қоғозга ўралган таржима бу жангнинг икки тарафлама фаоллиги ила, у хоҳ ерда бўлсин, хоҳ тик оёқда, бўлиб ўтишидан дарак бериши керак еди. Амалда эса биз бир тарафнинг "мастер-класс"ига гувоҳ бўлдик. Лекин бу зерикарли тўқнашув томоша қилганимиз маъносида келмайди. 

Шунчаки бири ҳужумкор, бири ҳимоявий ўйин билан муаззам кеча ўтказишди. Ғалабага етакловчи йўл эса ҳужумкорликдан ўтади. Бунга Ислам Махачев ва Хамзат Чимаевларнинг охирги жангларини мисол келтиришимиз мумкин.

Макс Холлоуэйнинг мураббийлари ва таҳлилчилари жанг олдидан Оливейра иштирокидаги баҳсларни таҳлил қилиб чиқишгани аниқ. Бироқ калит тўқнашувлар Илия Топурия ва Дастин Порьега қарши жанглар эди. Ана ўша баҳслар атрофида шогирдини тайёрлашлари лозим эди. Америкалик спортчининг мағлубиятидаги асосий омиллардан бири, тахмини ожизимча, мана шу ҳолат. Чунки излаган саволларига жавобни ана ўша ердан топишлари мумкин эди. Жумбоқ остидаги ҳақиқатни ушбу жанг превюсида ёзган мақоламизни ўқиган дўстларимиз жуда яхши билиб турибди.

Аммо Максни табриклашимиз мумкин бўлган жабҳалар ҳам бор. Жангчиларни 4 баллик тизимда таққослар эканмиз, кардиода 2 бал беришга бироз ўйланиб турган эдим. Бу жанг учун кардио борасида ишлагани кўзга ташландики, бу шармандаларча сабмишн мағлубиятига учрашдан уни муҳофаза қилди. Беш раунд ҳимояда чидаб берди.

Оливейранинг тейкдаунга ташаббусда муаммоси бор эканини ёзиб ўтгандим. Бугун унинг жанг кемаси рулини қўлига олиб, истаган тарафига буришдаги ютуғининг асосий омили айнан мана шу –тейкдаун қилишга ташаббускорлиги бўлди. Бу жабҳада яхшигина ишлабди. Зеро Холлоуэй тик оёқда услубини гапиртиш имкониятига эга бўлмасдан, ҳар раунднинг бошидаёқ тейкдаун бўлаверди. Масофани ушлолмади, буни Чарльздан кутмаган эди. Лекин узоғи икки раунддан кейин тактика, ёки мураббийларининг кўрсатмаси билан бунга чора топиши керак эди. Буни қилдими? Йўқ, албатта. Балки Ортегадан ташқари партерда уришадиган ММАчи билан аввал жанг қилмагани, айниқса бу даражадаги жангчига қарши октагонда тўқнашмагани учун жанг тактикаси шаклланмаган бўлиши ҳам мумкин.

Бразилиялик спортчининг эса ғалабага эришиш учун нималар қилиши керак эканини ёзган эдик, оқизмай-томизмай бу ишни уддалади, камчиликларини санаган эдик, Топурия, Махачев ва Царукиянга қарши баҳсларида йўл қўйган хатоларини тузатди. Шунинг учун, ҳам ўзини, ҳам мураббийларини, ҳамда таҳлилчиларини мақтов-ла ёрлақасак, арзийди.

Оливейранинг яна бир ютуқларидан бири, гарчи баҳс бошланмасидан олдин, шояд жанг беш раунднинг охиригача давом этса, “услуби қирпичоқ”қа ҳам розиман, деган бўлишига қарамай, тўқнашув пайтида сўнгги 10 сонияда Холлоуэйни клинчда тутиб туришга ҳаракат қилгани бўлди. Мухлислар хотири учун 5 сонияга изн берди, лекин бу жуда ҳам қисқа вақт ва бу вақтда Чарльзни нокаут қилиш қийин.

Хуллас, бу баҳсда сценарийни Оливейра ёзди, Макс рақибидан келган таклифни истаксиз қабул қилди. Энди “Оқ уй”да Топурия билан Гэтжи тўқнашуви бўлиб ўтиши аниқ. Оливейра ҳам яқинда келажак режаларини санаганида ярим енгил вазн чемпионлигини қўшганди. Шу боис, келаси жангида Волкановски билан икки қария, икки афсона, икки камар учун барчанинг кўзини ўзларига қаратишлари мумкин. Ёки Конор Макрегор варианти жозибалироқ келиши ҳам мумкин. Холлоуэй эса Чендлер ёки Пимблет икковидан бири билан тўқнаш келиш эҳтимоли юқори.

Азизбек ҒОЗИЙ тайёрлади