“Манчестер Сити” Ҳусановдан воз кечдими?
Ўзбекистон миллий терма жамоаси марказий ҳимоячиси Абдуқодир Ҳусановнинг “Манчестер Сити”даги аҳволи жуда кўп муҳокама қилинаётган мавзулардан ҳисобланади.
Европанинг бир неча нуфузли манбалар бу масалани ёритиб келмоқда. Хусусан, onefootball.com портали ўзбек легионерининг Манчестердаги келажагига оид мақола чоп этди.
Sports.uz портали ушбу манба “Манчестер Сити” Ҳусановни унутгани йўқ, унинг даври энди келади” сарлавҳали мақола орқали берган маълумотларни ўзбекистонлик футбол ишқибозлари эътиборига ҳавола этишни маъқул топди.
- Январь ойида “Манчестер Сити”га келиб, ўзидан жуда яхши таассурот қолдирган ўйинчилардан бири Абдуқодир Ҳусанов ҳисобланади. Ёш марказий ҳимоячи Англияга келиши билан Хосеп Гвардиола жамоасида тез ўзини кўрсатди.
Мураккаб ўйинларда Абдуқодир ўзининг қандай сифатларга эга эканини, салоҳияти “Манчестер Сити”нинг асосий таркибида ўйнаш учун етарли эканини намойиш қила олди.
Бироқ кейинги пайтда Ҳусанов таркибда кўринмай қолди. Бунинг ягона сабаби Рубен Диаш ва Йошко Гвардиола ҳимоя марказида жуда кучли тандем ташкил қилганидир. Шунингдек, Нико О'Райли чап қанот ҳимоячиси позициясида ўта самарали ўйнаётган ўзбек футболчисининг майдонга тушишига тўсқинлик қиляпти.
Ҳусанов Франциянинг “Ланс” клубидан “Манчестер Сити”га кўчиб ўтганидан кейин барча турнирларда “шаҳарликлар” учун тўққизта учрашув ўтказди. Бу баҳсларда ёш ҳимоячи тезкорлиги, жисмоний куч-қуввати ва ҳимояланиш маҳорати билан мухлису мутахассислар эътиборини қозонди.
Абдуқодир “Манчестер Сити”да ўйнай бошлаганидан кейин унинг тўпни назорат қилиш кўникмалари анча кучайди. Аслида “Манчестер Сити” бу ўйинчини ўз сафига қўшиб олишида Ҳусановнинг тўп билан муомала қилиш қобилияти ҳам муҳим омил сифатида қабул қилинган эди.
Ҳозирдан шуни таъкидлаш лозимки, келаси мавсум Ўзбекистон миллий терма жамоаси ҳимоячиси Хосеп Гвардиола жамоасининг муҳим бўлагига айланиши мумкин.
Айни пайтда Хосеп Гвардиола жамоанинг охирги муваффақиятларини таъминлаётган формуладан воз кечишга тайёр эмас. Нико О'Райли чап қанотни эгаллаши мавсум бошидан бери бу позицияда ўйнаб келган Йошко Гвардиолнинг ҳимоя марказига кўчишига сабаб бўлди. Табиийки, бу ҳолатда Ҳусанов ўз ўрнини хорватиялик футболчига беришга мажбур.
Ҳозирча, Абдуқодир захира ўриндиғида ўтирибди. Ҳусанов эндигина 21 ёшга тўлди ва “Манчестер Сити” ўйинчиси сифатида ўзини кўрсатиши учун етарлича вақти бор. У шу пайтгача ҳам Хосеп Гвардиола жамоасига фойда келтира олишини намойин қилиб келган. Шуниси аниқки, Пеп уни унутиб қўйгани йўқ. Шунчаки, бош мураббий жамоасининг ҳозирги муаммоларига сал бошқача ечим топди.
Бироқ таъкидлаш лозимки, Абдуқодир Ҳусанов “Манчестер Сити”да албатта яна ўзини кўрсатиш имконига эга бўлади. Балки бу имконият яқинлашиб келаётган клублар ўртасидаги жаҳон чемпионатида рўй берар, - деб ёзди onefootball.com портали.
Фикрлар