"Манчестер Сити" Ўзбекистон дебютига қандай муносабат билдирди?
Англиянинг машҳур «Манчестер Сити» клуби расмий ижтимоий тармоқ саҳифаларида Ўзбекистон терма жамоаси ва ҳимоячи Абдуқодир Ҳусановнинг 2026 йилги жаҳон чемпионатидаги дебютига бағишланган пост эълон қилди.
Клубнинг Instagram саҳифасида Ҳусановнинг суратлари жойлаштирилди. Унда футболчи «Манчестер Сити»нинг ўйин формасида, елкасига Ўзбекистон давлат байроғи осилган ҳолда камерага қараб тургани акс этган.
Пост остидаги қисқа изоҳда эса шунчаки: «Ўзбекистон», — деб ёзилган.
Ўзбекистон терма жамоаси ўз тарихида илк бор жаҳон чемпионатида «К» гуруҳида Колумбия, Португалия, Конго Демократик Республикаси терма жамоалари билан плей-офф йўлланмаси учун кураш олиб боради. Ўзбекистон термаси биринчи учрашувини айнан Колумбияга қарши Мехико шаҳридаги афсонавий «Ацтека» стадионида ўтказмоқда.
Гуруҳдаги дастлабки ўйин — Португалия ва Конго Демократик Республикаси ўртасидаги баҳс дуранг билан якунлангани боис, Ўзбекистон термасига ғалаба қозониш ва мусобақа бошидаёқ гуруҳда пешқадамга айланиш имконияти пайдо бўлди.
«Манчестер Сити» таркибида тўп сураётган Абдуқодир Ҳусанов иштирок этаётган клуб 2026 йилги жаҳон чемпионатида энг кўп футболчи билан қатнашадиган жамоа сифатида қайд этилди.
Турнир учун эълон қилинган якуний рўйхатларда «Манчестер Сити» клубининг 19 нафар футболчиси турли терма жамоалар шарафини ҳимоя қилади. Уларнинг ҳар бири 12 хил мамлакатни намоён этади ва бу кўрсаткич Англия Премьер-Лигаси тарихида янги рекорд сифатида қайд этилди.
Фикрлар