“Манчестер Сити” тўртта дарвозабон танлади

“Манчестер Сити” мутасаддилари асосий дарвозабон Эдерсон ўрнини боса оладиган янги номзодлар рўйхатини тузиб чиқди.

Бразилиялик дарвозабон фаолиятини бошқа лигаларда давом эттириши мумкин. Саудия Арабистони клублари анчадан бери Эдерсонни ўз лигаларига таклиф қилиб, катта маош ваъда қиляпти.

Таниқли  журналист Грэм Бэйли “шаҳарликлар” Эдерсон ўрнига ёш ва иқтидорли номзод топиб, дарвозабон муаммосини узоқ муддатга ҳал этишни маъқул кўрмоқда. Айни пайтда манчестерликлар тўртта голкиперни кўзлаб турибди.

Хосеп Гвардиола жамоаси ёзда Дзион Судзуки (22 ёш, “Парма”), Люка Шевалье (23 ёш, “Лилль”), Анатолий Трубин (23 ёш, “Бенфика”) ва Жоан Гарсия (23 ёш, “Эспаньол”) каби янги авлод дарвозабонларидан бирини олишга ҳаракат қилади.

31 ёшли Эдерсоннинг “Манчестер Сити” билан амалдаги шартномаси 2026 йилнинг 30 июнигача давом этади.