"Манчестер Сити"нинг Премьер-лига давридаги энг яхши футболчилари рамзий жамоаси: Агуэро, Компани ва бошқалар!

Англия Премьер-лигасида гранд клублар талайгина. Ушбу лига доим тезкор ўйинлари ҳамда кучли рақобати билан бошқа лигалардан ажралиб турган. Лиганинг рақобатбардошлиги ошишида эса гранд клубларнинг ўрни беқиёс. XXI асрнинг илк декадасида ушбу лиганинг бир жамоасига араб шайхлари томонидан йирик сармоя киритилганидан ҳамда бу сармоя ўзини оқлаганидан сўнг, «туманли альбион»даги гранд клублар сони биттага кўпайгани ҳаммамизга маълум. Бу «Манчестер Сити» клубидир!

Албатта, клуб Шайх Мансур қўл остига ўтганидан сўнг нафақат Англия миқёсидаги, балки жаҳон даражасидаги ҳам кўплаб футболчилар билан шартнома имзолаган. Уларнинг рамзий жамоасини тузиб чиқиш ҳам кишига анчагина завқ бериши шубҳасиз. Демак, Англиянинг XXI асрдаги энг яхши клубларидан бири бўлмиш «Манчестер Сити»нинг Премьер-лига давридаги энг яхши футболчилари рамзий жамоасини тузиб чиқамиз, бошладик!

Дарвозабон: Жо Харт

Гарчи “Этиҳад” стадионини тарк этганидан сўнг, фаолиятида кескин пасайиш кузатилиб, ўз даражаси тушиб кетганига қарамай, Жо Харт ўша даврда Англияда биринчи рақамли дарвозабонлардан бўлган. У баъзи мутахассислар томонидан ўшанда дунёнинг энг яхши дарвозабони, деб ҳам эътироф этилгани бежиз эмас, албатта. Англиялик кипер Роберто Манчини ҳамда Мануэль Пеллегрини қўл остида чемпионликка эришган мавсумларида жамоанинг ажралмас бўлагига айланган ҳамда умумий ҳисобда 4 марта Премьер-лига “Олтин қўлқоп”ини қўлга киритган.

Бундан ташқари, 2015 йилги ЕЧЛ доирасидаги “Барселона” билан баҳсдан сўнг, Лионель Месси уни “Феномен”, деб атаган. У ҳақиқий афсона!

Ўнг қанот ҳимоя: Пабло Сабалета

Клуб сафида 300 дан ортиқ ўйин ўтказган, орқа чизиқдаги ўта маҳоратли ўйинлари билан мухлислар ёдида қолган Пабло Сабалета том маънода клуб афсонасидир. У каби барқарор ва кучли ўйин намойиш этган ҳимоячилар АПЛда камдан-кам учрайди. Аргентиналик футболчининг хужумларда бевосита қатнашиши, ўйинни оқилона ўқиши ва ҳимоядаги кучли ҳаракатлари уни мухлислар севимлисига айлантирибгина қолмай, 9 йил давомида асосий таркибдан жой ҳам кафолатлаб берган. У клуб учун ўта муҳим шахс бўлганлиги шубҳасиз!

Марказий ҳимоя: Венсан Компани (с)

Ҳақиқий туғма етакчи, майдон ичида ҳам, ташқарисида ҳам бирдай юксак фазилатларга эга бўлган бельгиялик футболчи клуб муваффақиятларида доим муҳим аҳамият касб этган. У сардорлик боғичини узоқ муддат давомида тақиб, уни доим муносиб ҳимоя қилиб келган. Шу сабаб ҳам сардорлик боғичини айнан унга топширмоқдамиз. Кўплаб жароҳатлар туфайли фаолиятининг якуни ҳам бир қанча узилишлар билан узуқ-юлуқ тарзда кечган. Кетма-кет жароҳатлар унинг майдонга қайтишига ҳамда фаолиятини чиройли якунланишига халақит берганлигига қарамай, у ўзининг сўнгги мавсумини идеал тарзда якунлаб олиб, номини тарихга муҳрлашга эришган. Компанининг «Лестер»га қарши кечган баҳсдаги 25 метрдан урган суперголи «Сити»нинг кетма-кет иккинчи мавсум кубокни қўлга киритиши учун ҳал қилувчи аҳамиятга эга бўлгани ҳеч кимга сир эмас. Шундай экан, у бу ўрин учун муносиб!

Марказий ҳимоя: Аймерик Льяпорт

Гарчи, Франция терма жамоаси томонидан бепарволик қилиниб, йиғинларга чақирилмаётганига қарамай, Льяпорт бутун Европа миқёсидаги топ ўйинчи бўлиб қолаверади. Ҳимоядаги кучли прессингларда фаол қатнашиши, Гвардиоланинг «тики-така»сига жуда мос тушиши ҳамда ҳужумларда қатнашиб, боши билан яхши ўйнаши эвазига у клубнинг ва мухлисларнинг севимлисига айланган. Льяпорт Гвардиоланинг ҳақиқий имзосидир.

Чап қанот ҳимоя: Александр Коларов

Сербиялик Коларов «Манчестер Сити» тарихидаги энг кучли чап қанот ҳимоячиси бўлган. Тўғри, у билан деярли бир хил даражада майдонда тўп сурган Гаэл Клиши ҳам шундай деб эътироф этилади. Бироқ Клишининг Коларовникидек супер қобилиятлари йўқ эди.

Сербиялик ҳимоячи мунтазам равишда ҳужумларга қўшилиб туриши, чап оёғида супер зарбалар бериши, жарима зарбаларини қойилмақом тарзда ижро этиши ҳамда ҳимоядаги важоҳатли ҳаракатлари билан доим ажралиб турган. Умуман олиб қараганда, клуб сафида 7 мавсум ўтказиб, жамоанинг 5 та соврин ютишида муҳим роль ўйнаган футболчини бу жой учун муносиб кўришимиз аниқ эди.

Ярим ҳимоя: Яя Туре

Рамзий жамоамиз 4-3-3 тактик схемаси асосида тузиб чиқилганлиги боис майдон маркази эгалари бўлмиш ярим ҳимоячиларнинг конкрет позициялари ҳақида сўз юритмадик. Шу туфайли, уларни исталган қанотга, ёки марказга қўйиш мақсадга мувофиқ бўларди.

Демак, Яя Туре ҳақида. Кот д’Ивуар футболчисининг қўлидан келмайдиган иш деярли йўқ эди. Мухлислар ҳалигача унинг 50 метрлардан берган зарбаларини, рақиб билан яккама-якка курашларда ютиб чиқишларини ва тезкор рейдларини эслаб юради. У том маънода жамоага борини бера олган, кўп меҳнат қилган. Унинг жамоа ва клубга кўп меҳнатлари сингган. Айнан шу туфайли, Премьер-лига тарихидаги энг чиройли голлардан бири, дея тан олинган голга муаллифлик қилган «Яҳё Тўра»ни рамзий жамоамиз учун муносиб дея кўрдик, ва у бунга мутлақо ҳақли!

Ярим ҳимоя: Фернандиньо

Қарийб 7 йил давомида клуб ярим ҳимоясида яширин махфий қурол вазифасини бажариб келаётган, Гвардиоланинг алмаштириб бўлмас ўйинчисига айланган ҳамда жамоанинг ўсишида беқиёс хизмат кўрсатган Фернандиньосиз рамзий жамоани тасаввур қилиш қийин. У доим майдон марказидаги кўзга кўринмас қора меҳнатлари билан мухлислар ва жамоасининг меҳрини қозонганлиги бор гап. Ҳаттоки, бир сафар Фернандиньо жароҳат олган 2 ҳафтада «Сити» қанчалар қийин вазиятга тушиб, унинг ўрнига номзод топа олмай, қийналгани ҳеч кимга сир эмас. Бундан ташқари, фаолиятини давом эттираётган бразилиялик футболчининг замонавий оригинал паслари, тез югуриши ва вақти-вақти билан гол уриш таҳдиди унинг «Сити»га ҳали жуда кўп нарсаларни таклиф қилишини англатади. Ҳақиқий афсона!

Ярим ҳимоя: Давид Сильва

Премьер-лига даврида «Сити» таркибида Давид Сильвачалик кўп соврин ютган футболчини топиш иложсиз. У 10 мавсум ичида клуб билан 14 та турли мусобақалар чемпионлигини тантана қилган. Бундан ташқари, Сильва ўзининг ажойиб плеймейкерлиги, қойилмақом паслари, шедевр голлари ҳамда кучли сардорлиги билан ҳам мухлислар қалбидан чуқур жой эгаллаган эди. Яқиндагина клубни тарк этган футболчини баъзи маҳаллий мутахассислар Премьер-лигадаги энг яхши легионер футболчи, деб ҳам таърифлаган. Бироқ айрим хейтерлар унга нисбатан «ўта қийин ўйинлар ўтказмаган ҳамда оддий ўйинлар эвазига муваффақиятга эришган», дея таъриф ҳам беришган. Лекин бу шунчаки «негатив коммент» холослиги ҳаммамизга маълум. Силванинг салоҳияти ва буюклигига ҳеч кимнинг шубҳаси йўқ. Шундай экан, испаниялик хавбек рамзий жамоамиздаги бу ўрин учун мутлақ ҳақли!

Вингер (ўнг қанот): Кевин Де Брюйне

Ниҳоясига етган мавсумда жаҳон миқёсида йилнинг энг яхши ўйинчилари номзодлари орасида қаҳрамонимиз доимий равишда кучли учликдан жой олиб келди ҳамда АПЛда “йил ўйинчиси”, деб эътироф этилди. Бу натижа бежизга эмас. Унинг «Сити» сафидаги супер мавсуми, Анрининг ассистлар борасидаги рекордини такрорлаши ва суперсермаҳсуллиги Кевиннинг эътироф этилишига сабабчи бўлди. Профессионал фаолиятининг бошида «Челси» билан омадсизликка учрагач, кейинчалик «шаҳарликлар» сафида ўйини очилади ва дунёнинг энг яхши ўйинчилари орасида эътироф этилади. Де Брюйне ўзининг заргарона узатмалари, кучли зарбалари ва барқарор ўйинлари эвазига «шаҳарликлар» тарихидаги энг кучли футболчилар рўйхатидан жой олишга эришди! Ҳақиқий етакчи!

Вингер (чап қанот): Раҳим Стерлинг

Бир вақтлар Стерлинг учун «Сити» раҳбарияти 49 миллион фунт (63 миллион евро) сарфлаганида, кўпчилик бу трансфернинг фойдасизлиги ҳамда Стерлингнинг очилиши қийин эканлиги ҳақида фикр билдирган эди. Бироқ Раҳим бу гапларнинг барчаси ноўрин эканлигини ўз голлари ҳамда барқарорлиги билан исботлаб қўйди. Гвардиола қўл остида Англиялик вингер мавсумдан мавсумга такомиллашиб, Премьер-лиганинг энг хавфли ҳужумчиларидан бирига айланди ва сўнгги беш мавсумда 6 та совринни қўлга киритди. Умумий ҳисобда, «Сити» сафидаги голлари сонини 100 тадан ошириб олган футболчи сўнгги 3 мавсумда 20+ гол уриб, ўз сермаҳсуллиги билан барчани ҳайрон қолдириб келмоқда. У яқин келажакнинг суперюлдузларидан бири бўлиш учун асосий номзодлар қаторида эканлиги шубҳасиз! Шу туфайли, рамзий жамоадан ўрин олиш учун ҳақли!

Марказий ҳужумчи: Серхио Агуэро

Оддийгина гап билан Агуэрони таърифлаймиз: Агуэро - «Манчестер Сити»нинг барча даврлардаги энг яхши тўпурари! Барқарорлик жиҳатидан кўпчиликка дарс ўта оладиган Аргентиналик форвард фаолияти якунига қадар Премьер-лига тарихидаги энг яхши тўпурарлар учлигига ҳам кириб олиши мумкин. Бундан ташқари, айнан Агуэро Премьер-лиганинг энг яхши легионер тўпурари ҳам ҳисобланади. Ҳақиқий, топ страйкер! Унинг совуққон ўйинлари, гол машинаси эканлиги ва барқарор фаолияти «шаҳарликлар»нинг ҳақиқий тирик афсонасига айланишига замин яратган. Агуэро - сўзсиз етакчи!

Бош мураббий: Пеп Гвардиола.

Жаҳон футболининг энг буюк мураббийларидан бири бўлган испаниялик мутахассис “Сити”ни ҳақиқий топ-даражага олиб чиқа олган ва Европанинг ҳар қандай жамоаси билан тенгма-тенг рақобат уюштира олувчи клубига айлантирган. Бироқ ҳали-ҳануз еврокубоклар борасида муваффақиятсизликка учрашда давом этаётган мутахассиснинг фаолияти айнан шу фактор туфайли танқид тошлари остида қолиб кетиши ҳеч гап эмас. Бироқ унда ҳали вақт етарлича. Клуб билан шартномасини 2023 йилгача узайтирган мураббий келаси мавсумларда бу бўйича жиддий кураш олиб бориши аниқ ва ўйлаймизки, буюк мураббий клубини ҳам буюк натижага эриштира олади!

Захира ўриндиғи.

Дарвозабон: Эдерсон. Жо Хартчалик кўп натижага эришишга улгурмаган, бироқ сермаҳсуллик кўрсатишда давом этаётган супер дарвозабон захира учун идеал номзод;

Ҳимоячилар: Майка Ричардс, Ричард Данн. Майка Ричардс клубнинг ўз академияси тарбияланувчиси ҳисобланувчи маҳаллий иқтидор ҳисобланади: футболчи бир неча мавсум «Сити» учун катта фойда келтира олган. Ричард Данн эса кетма-кет 4 мавсум клубнинг энг яхши ўйинчиларидан бири бўлган ҳамда рамзий жамоаларидан жой олган;

Ярим ҳимоячилар: Шон Райт-Филиппс, Георги Кинкладзе. Филиппс ҳам худди Ричардс сингари маҳаллий иқтидор ҳисобланиб, клубнинг қадрдон футболчиларидан бири ҳисобланади. Кинкладзе эса клубнинг 90 йиллар охирларидаги томоша қилишга арзийдиган ягона футболчиси эди.

Ҳужумчилар: Карлос Тевес, Эдин Жеко. Рамзий маънога эга бўлган икки топ страйкер, жаҳон даражасидаги ҳақиқий форвардлар. Уларсиз «Манчестер Сити» кўп натижаларига эришиши жуда қийин бўлар эди.

Абдулла Маннонов тайёрлади.