O‘zbekiston Rossiya terma jamoasi bilan o‘ynamoqchi

O‘zbekiston futbol assotsiatsiyasi va Rossiya futbol ittifoqi joriy yil oxiriga qadar milliy jamoalar o‘rtasida o‘rtoqlik uchrashuvi o‘tkazish bo‘yicha muzokaralarni davom ettirmoqda.

Sport24 nashrining yozishicha, Valeriy Karpin boshqaruvidagi Rossiya terma jamoasi va Fabio Kannavaro qo‘l ostidagi O‘zbekiston termasi o‘yini noyabr oyida bo‘lib o‘tishi mumkin. 

Avvalroq Rossiya tomoni o‘zbekistonliklarga 25 sentabr kuni mehmon sifatida kelib o‘ynashni taklif qilgan edi. Biroq bu reja amalga oshmadi, chunki O‘zbekiston termasi taqvimi oldindan tuzib qo‘yilgan: 24 sentabr kuni Farg‘onada Eron terma jamoasiga qarshi bellashuv o‘tkaziladi.

Bundan tashqari, O‘zbekiston milliy terma jamoasi 1 oktabr kuni Suriya futbolchilari bilan bilan o‘yin o‘tkazadi va  6 oktabrda esa, Koreya Respublikasi vakillariga qarshi bo‘ladigan o‘rtoqlik uchrashuvida maydonga tushadi.

Ayni paytda Rossiya va O‘zbekiston futboli rahbarlari muloqotni davom ettirmoqda. Tomonlar BetBoom ko‘magida o‘rtoqlik bahsini shu yilning noyabr oyida o‘tkazish uchun qulay sana va joy izlamoqda.

Yaqinlashib kelayotgan terma jamoalar tanaffusida Valeriy Karpin boshqaruvidagi Rossiya terma jamoasi uchta o‘yin o‘tkazishi rejalashtirilgan. 29 sentabr kuni rossiyaliklar Eronga qarshi maydonga tushadi, 3 oktabrda Namibiyaga qarshi bahs olib boradi, 6 oktabrda esa Nigeriya terma jamoasiga qarshi o‘ynaydi.

Eslatib o‘tamiz, o‘tgan yozda italyalik mutaxassis Fabio Kannavaro boshchiligidagi O‘zbekiston terma jamoasi jahon chempionatida debut qilgan edi. Biroq o‘zbekistonliklar guruh bosqichidagi uchala o‘yinda Kolumbiyaga 1:3, Portugaliyaga 0:5 va Kongo Demokratik Respublikasi terma jamoasiga 1:3 hisobida yutqazdi.

O‘zbekiston va Rossiya milliy terma jamoalari bungacha bir marotaba o‘zaro o‘yin o‘tkazib, golsiz durang o‘ynagan edi.