Мареска: "Эстевао ва Ямални Месси билан Роналдуга солиштириш керак эмас"

"Челси" бош мураббийи Энцо Мареска Европа Чемпионлар Лигаси умумий босқич 5-туридан ўрин олган "Барселона"га (3:0) қарши ўйиндан сўнг ёш футболчилар ҳақида гапирди. Мураббий ёш Эстевао ва Ламин Ямални Криштиану Роналду ва Лионель Месси каби футбол афсоналари билан таққосламасликка чақирди. Мутахассиснинг фикрича, бундай таққослашлар ёш футболчиларга ортиқча босим ўтказади.

"Эстеваонинг "Барселона"га урган голи менга клублар ўртасидаги жаҳон чемпионатида бизга урган голини эслатди. Жуда ўхшаш, бир хил ҳаракатлар.

У дам олиши, ўз ўйинидан завқ олиши, футбол ўйнаши керак. У ва Ламин Ямал 18 ёшида ҳали жуда ёш йигитлар, агар Роналду ва Месси ҳақида гапирадиган бўлсак, бу улар каби ёш йигитлар учун жуда катта босим. Улар машғулотларга хурсанд бўлиб келишлари керак, бироқ уларни ўша иккиси билан солиштирадиган бўлсак, бу ортиқча", - дея Маресканинг сўзларини келтирди Sky Sports.

Ушбу ўйин куни якунланганидан сўнг, Лондон клуби 10 очко жамғариб, Чемпионлар лигаси йиғма жадвалида бешинчи ўринда бормоқда.