"Машъал" устози: "Рақиб жамоа "автобус" қўйиб ўйнаганидан кейин қийинчилик туғдиради"

Суперлиганинг 23-туридаги “Машъал” - “Бухоро” (0:0) учрашувидан кейин муборакликлар бош мураббийи Отабек Нарзуллаев матбуот анжуманида фикрлари билан ўртоқлашди.

- “Бухоро”га қарши учрашувга тайёрлангандик. “Бухоро” охирги ўйинларини яхши ўтказди. Рақибни узун паслар билан ўйнашини билардик. Қарши ҳужумлар ва стандарт вазиятлардан ўтказиб юбормасак тез гол уришимиз керак эди. Режамиз бўйича тез гол ура олмадик. Йигитлар ҳаракат қилишди. Лекин “Бухоро” дарвозабони анча вазиятларни бартараф қилди. Шу боис биз тезкор гол ура олмадик.

- “Машъал”га айнан нима етишмади?

- “Машъал”га нима етишмади? Шижоат, ўйинга чанқоқлик етишмади. Шунга қарамай, футболчилар ҳаракат қилишди. Имкониятлардан фойдалана олмадик. Охирги нуқтани қўйишда оқсадик. Йигитларда шижоатни кўрмадим. “Бухоро” 10 киши бўлиб қолганимиздан кейин бемалол ютамизми, деб ўйлаган фикр бор эди шекилли, футболчиларда.

- Шижоат етишмади деяпсиз. “Машъал” турнир жадвалида хавфли ҳудудга яқин жойда турибди. Буни ўйинчилар ҳис қилиши керак. Шундан келиб чиқиб, футболчиларда шижоат етишмаслигини нормал деб ҳисоблайсизми?

- Йўқ, нимага? Бор кучимиз билан ҳар бир ўйинга тайёрланаётгандик. Футболчилар қанақа ўйин бўлишини билишарди. Рақиб жамоа жарима майдони яқинида автобус қўйиб ўйнаганидан кейин футболчиларга қийинчилик туғдиради. Гол ура олмасангиз бу ўйинчиларга руҳий томондан янада қийин бўлиши мумкин. Бошида гол уриб олганимизда ўйин биз томонга бўлиши мумкин эди. Тўп назорати бизда бўлди ва вазиятларимиз ҳам етарлича эди. Бу футбол. Гол урмасангиз юта олмайсиз.

- “Машъал” энг кўп гол ўтказиш бўйича “Шўртан”дан кейин иккинчи ўринда. Ҳимояда қандай муаммоларни кўряпсиз?

- Ҳимояда ҳозирги ҳолатимиз анча яхши. Кўп гол ўтказиб юбормаяпмиз. Анча яхшиладик, деб ўйлайман. Бундан кейин ҳам гол ўтказиб юбормасликка ҳаракат қиламиз.

- Сардор Абдураимов ўрнига Шарипов майдонга тушганидан кейин Сардорда норозилик кайфияти сезилди...

- Йўқ, ўйинда бўлиб туради. Вазиятлардан фойдалана олмаётгандик. Шунга ўйинчиларга эътироз билдириб чиқиб кетди. Биз билан ҳеч қанақа муаммо йўқ.