Маскерано нега Месси кетма-кет икки учрашувни ўтказиб юборганини тушунтирди

Хабарингиз бор, Лионель Месси "Интер Майами" сафида кетма-кет икки учрашувдан буён майдонга тушмаяпти. Шу боис, баъзи манбалар унда мушаклар зўриқиши билан боғлиқ муаммо борлигини тахмин қилишаётган эди. Бироқ, жамоа бош мураббийи Хавьер Маскерано сўнгги учрашувдан сўнг ушбу саволга тўлиқ жавоб бериб, нега ўйинларда иштирок этмаётганини очиқлади. 
 
"Лео борасида мен жамоа шифокорларининг тавсияларига амал қиламан. Уларнинг айтишича, унда ҳеч қандай жароҳат ёки шикастланиш йўқ. Месси атиги олти кун ичида учта ўйин ўтказди ва бу, албатта, чарчоққа олиб келди. 
 
Иқлим шароитининг ўзгариши ҳам ўз таъсирини ўтказди. Биз аргентиналик юлдуз ҳақида қайғурамиз ва унинг ортиқча зўриқишини хоҳламаймиз. Шу сабабли, барча хавфларни ҳисобга олган ҳолда, унга дам беришга қарор қилдик. 
 
Албатта, дунёнинг энг яхши футболчисисиз ўйнаш қийин. Лекин биз олдинга интилиб, у бўлмаса ҳам ўйнашни ўрганишимиз керак," – деди аргентиналик мутахассис. 
 
Маълумот ўрнида, 37 ёшли ҳужумчи "Интер Майами" сафида умумий 42 та учрашувда иштирок этиб, 36 та гол ва 20 та голли узатмага муаллифлик қилган.