Мбаппе ўзини немислар олиб кетмоқчи бўлганини ошкор қилди

“Реал” сафида порлаётган Килиан Мбаппенинг фаолияти умуман бошқача бўлиши мумкин эди. ҳужумчи ўзининг илк жамоаси – “Монако”да ўйнаб юрган кезлари унга Бундеслига клублари харидор бўлганини тан олди.

- Менга жуда кўп клублардан мурожаат бўлган. “Монако”да ўйнаб юрганимда “Бавария” алоқага чиққан. Ўша пайтда “Боруссия Дортмунд” ва “Лейпциг” ҳам қизиқиш билдирган эди. Яна бир неча клублар бўлган, лекин ҳозир уларнинг номи эсимда йўқ, - деди Килиан Мбаппе.

“Монако” тарбияланувчиси бўлган ҳужумчи 2017 йили Франциянинг энг бадавлат клуби “Пари Сен-Жермен”га кўчиб ўтди ва бу жамоа шарафини 2024 йилнинг ёзигача ҳимоя қилди.

Бир йил муқаддам парижликлар билан шартномаси тугаганидан кейин 26 ёшли Мбаппе “Реал”га кўчиб ўтди ва дебют мавсумдаёқ ҳар қандай лигада ўйнай олишини намойиш қилди.