Менга ҳам ўзбекистонлик футболчидек катта пул тўланглар!

Қозоғистон преиьер-лигасида иштирок этаётган “Ордабаси” жамоаси ҳужумчиси Жерар Гоу ҳозир ўзига тўланаётган маошдан норози бўлмоқда ва берилаётган маблағни оширилишини талаб қиляпти.

Қозоғистоннинг https://vesti.kz/ нашри тарқатган ҳамбарга кўра, ивуарлик тўпурар “Тобол” клуби Ўзбекистон миллий терма жамоаси ҳужумчиси Игорь Сергеевга тўлаётган даражада маош олишни истаётганини хабар қилди.

Маълумки, яқинда айрим манбалар легионеримизнинг қозоқ клубидаги маоши 300 минг долларни ташкил этиши ҳақида хабар чиқарган эди. Лекин Кустанай клуби бу маълумотларни инкор қилди.

Баъзи оммавий ахборот воситалари ва бошқа манбаларда “Тобол” футболчиси Игорь Сергеевнинг йиллик маоши 300 минг долларни ташкил қилиши ҳақида хабарлар тарқатилди.

“Тобол” футбол клуби расмий муносабат билдириб, вазиятга қуйидагича изоҳ берди.

Бу маълумот ҳақиқатга тўғри келмайди.

Сергеев билан клуб ўртасидаги шартноманинг молиявий бандларини ошкор қилиш меҳнат шартномасининг конфиденциаллик талабларига тўғри келмайди. Бироқ, айтиш жоизки, ўзбекистонлик ҳужумчининг маоши юқорида кўрсатилган суммадан бир неча баравар кам. “Тобол” футбол клуби фақат расмий маълумотларга ишонишга чақириб қолади, - деб баёнот берди Кустанай клуби.

Жерар Гоу жароҳати туфайли “Ордабаси”нинг Туркияда ташкил этилган йиғинида иштирок этмаяпти. Унинг талаби мухлису мутахассисларга ёқмади.

- Ўзинг сув ичиб турган қудуқ сувини булғама! Бу сенинг ортиқча вазнингга қарамай, ўз сафига қабул қилгани учун клубга бўлган раҳматингми, Гоу?”, - деб ёзмоқда манбалардан бири.

34 ёшли футболчи  2014-2017 йилларда “Қайрат” клуби шарафини ҳимоя қилган. Бу даврда у 2015 ва 2016 йиллардаги чемпионатларда 22 тадан, 2017 йили 24 та тўп киритиб, тўпурарлик маҳоратини намойиш қилган эди.

Орада Хитой ва Туркия чемпионатларида тўп тепган моҳир ҳужумчи 2021 йили жамоасиз қолганидан кейин ўтган йили мартда яна Қозоғистон премьер-лигасига қайтиб келиб, “Ордабаси” сафига қўшилди.

Жерар Гоу ўтган йилги  мавсумда актюбеликлар сафида чемпионатда 21 та учрашув ўтказиб, рақиблар дарвозасини саккиз маротаба ишғол қилди ва жамоадошларига учта голли пас узатди.

Игорь Сергеев Қозоғистон премьер-лигасидаги дебютини 2021 йили “Актобе” жамоасида бошлаган. Ярим мавсумдан кейин мақсадлари жиддий бўлган “Тобол”га кўчиб ўтди.

29 ёшли ҳужумчимиз ўтган мавсумда “Тобол” сафида Қозоғистон чемпиони бўлди. Чемпионлик мавсумининг иккинчи ярмидан кустанайликлар сафига кўчиб ўтган легионеримиз еттита учрашувда рақиблар дарвозасини тўрт маротаба ишғол қилган эди.

Ўтган мавсумда эса Сергеев  премьер-лигада 26 та ўйинда тўққизта гол ва иккита ассист қайд этди. Европа Чемпионлар лигасидаги голлари ҳисобини очди ҳамда Қоозоғистон кубогида иккита учрашувда бир жуфт тўп киритди.

Бундан ташқари, Игорь Сергеев Ўзбекистон миллий терма жамоаси сафида 67 та беллашувда майдонга тушиб, ўз ҳисобига 19 та гол ёздириб қўйилди.

Легионеримиз лигани тарк этмоқда. Мураббийнинг илтимоси ўтмади!