Месси менга етвол! Роналду ўзининг энг катта рекордини яна янгилади

Саудия Арабистони чемпионатининг бешинчи турида “Ан-Наср” футболчилари “Ал-Аввал Парк” стадионида “Ал-Фатех” жамоасини қабул қилиб, 5:1 ҳисобида зафар қучди.

Риёдликларнинг йирик ҳисобини таъминлаган барча голларга Европа майдонларида порлаган юлдузлар муаллифлик қилди. Жоау Феликс хет-трик қайд этган бўлса, Криштиану Роналду ва Кингсли Коман биттадан гол урди.

Кўпчиликнинг эътибори Роналду киритган тўпга қаратилди. Бу 40 ёшли ҳужумчи фаолиятидаги 949 гол бўлди ва янги рекорд сифатида қайд этилди.

Маълумки, Роналду жаҳон футболида расмий учрашувларда энг кўп гол урган ўйинчи ҳисоблаади. Футбол жамоатчилиги португалиялик юлдузнинг гол уриш бўйича минглик маррани забт этиши кутмоқда.

Экспертларнинг ҳисоб-китобига кўра, агар Роналду самарадорлигини ҳозирги тепмда давом эттирса, келаси йилнинг октябрь ойига бориб, фаолиятидаги голлари сонини 1000 тага етказиб олиши мумкин.