Месси – тадқиқотчи, Роналду – денгизчи, Кейн – учувчи

Аксарият футбол ишқибозлари ҳозирги ва ўтмишдаги ўйинчиларни бир-бирларига солиштиришга ҳаракат қилишади. Агар соат милларини ўзгартира олганимизда, Марадона ва Месси ўйини қандай тус олар эди?

Рассом Ден Лейдон ҳам бугунги кун юлдузларини машҳур футболчи каби эмас, балки ўша даврда яшаган оддий инсон сифатида ўтмишда талқин қилди. Натижада, сизга тақдим қилинаётган қуйидаги қизиқарли асарлар пайдо бўлди:

Месси Аргентина саргузашт федерациясининг тадқиқотчиси бўлиши мумкин эди.

Энди Кэрролл 70 йиллар охирида «Мидлсбро»да тўп сурувчи баҳайбат йигитлигича қолаверар эди.

Эммануэль Адебайор нафис кийим-кечакка бурканган ҳолда энг танқис таомларни танавул қилиб, кунни бекорчилик билан ўтказадиган парижлик аристократ бўлиши мумкин эди.

Харри Кейн, шак-шубҳасиз, зоти олияларининг жасур учувчиси бўлиб, 40-йилларда немис бомбардимончиларини дахшатга соларди.

Криштиану Роналду, Мадейра оролининг бошқа денгизчилари каби Магелланнинг буюк ютуқ ва жасоратлари орзуси билан яшар эди.

Стивен Жеррард – «қизил»ларнинг энг обрўли мухлисларидан бири. Биринчи жаҳон урушига қадар, Ливерпул мухлислари ҳаракатини бошқарган. 1918 йилга келиб ёшларга йўл берган ҳолда, «ўйин»дан чиқди.

Луис Суарес 70 йилларнинг бирор-бир машҳур мусиқий гуруҳи раҳбари бўлишида, унинг «портловчи» характери қўл кела олиши мумкин эди.

Ибранинг оёқларини ўйнатишга бўлган муҳаббати, албатта хитойлик режиссёрларнинг эътиборини тўртган бўлиб, Жеки Чан ёки Брюс Ли иштирокидаги фильмлардан бирида суратга тушган бўларди.

Тотти билан боғлиқ ҳолат жуда оддий! Франческо Рим империясининг янги императори бўлиб тахтга чиқар ва 476 йилда империя қулашининг олдини олган бўларди.

Диего Коста  80-йилларда ўтказиладиган кечаларининг қироли. Унинг кундалик ҳаёти турли хил базмлар, кўнгилхушликлар, баланд мусиқа, гиёҳванд моддалар, спиртли ичимликлар ва аёллардан иборат. Костанинг Санта Понсада жойлашган яхта ишлаб чиқарувчи бизнеси унга қизиқарли ва кўнгилхушликларга бой ҳаёт кечиришини таъминлар эди.

«Уолл-стрит бўриси» ҳикоясини биласизми? Ундай бўлса, Серхио Рамос четда асаблари таранг ҳолатда сигарет чекиб турган ушбу ҳикоянинг бош қаҳрамон Дини эслатиб юборади. Серхио 80-йилларнинг энг яхши брокери бўлиб, ҳар қандай келишувга бурун суқиб фойда олишдан бош тортмайди.

Неймар, Париж, 1772 йил. Ушбу бразилиялик футболчи денгиз тадқиқотчиси сифатида ўз мақомини топди ва эндиликда куни бўйи денгиз тубига шўнғиш билан машғул.

Жон Терри, Лондон, 1965 йил. Сутфуруш. Террининг аввалги раҳбарларидан бири шундай деди: «Жон бизда ишлаган энг содиқ ва мақсадли ишчи эди. Ҳеч қачон ишни қолдирмас ва ўз ихтиёри билан бўш вақтларида ишлаш таклифини билдирадиган ягона инсон бўлган».

Месут Ўзил немис сиёсатчиси вазифасини бажарганда кўрсатган жонбозлиги сабабли немис канцлери лавозимига кўтарилди. У давлатни 1913 йилдан то 1946 йилгача бошқарган бўлиб, унинг бошқарув даври немис иқтисодиёти гуллаб-яшнаган йиллари сифатида тарих зарварақларига битилди.

1849 йил. Артуро Видал «қора бозор»даги рақибларидан халос бўлиш мақсадида тиззасигача қонга ботди. Федерал Қидирув Бюроси (ФҚБ) уни 15та штатда қидирар экан, бу вақт мобайнида Артуро Мексика барларининг бирида ўзининг «тоза» пулларини виски ва қизларга сарфлар эди.

Голливуд бульвари, 1922 йил. Махсус детектив сифатида Садио Мане кўп нарсани кўрган эди, эҳтимол керагидан кўп.

1975 йил боксда эслашга арзирли фақат битта боксчи бор эди – Лука Модрич. Мутахассисларнинг фикрига кўра, унинг жангдаги энг катта қуроли бўлмиш агрессия уни рингдаги энг шавқатсиз боксчи сифатида танилишга замин яратган эди. У барча вазн тоифаларида жанг қилган ва ҳар доим ғалаба қозонган.

Голливуд, 1977 йил. Агар ўша вақтнинг бирор режиссёри жангари жанрида кино суратга олмоқчи бўлса, бош роль Салоҳдан бошқа актёрга насиб қилмас эди. Мисрликнинг тезлиги, техникаси ва реакцияси уни киноматографиядаги асосий юлдузга айлантирган бўлар эди.

1890 йил, Бродвей, Ню-Йорк. Реклама флаеридан олинган жумла: «Ҳақиқий мўъжизага гувоҳ бўлиш учун шошилинг! Буюмларнинг бир жойдан бошқа жойга кўчиб ўтишига ишонасизми? Ҳайратланишга тайёрланинг! Дунёнинг энг маҳоратли ва энг машҳур кўзбўямачиси. Ягона ва тенги йўқ, ажабтовур Рикельме!»