Мессининг 400 миллион евролик “сири” очилди

“Барселона”нинг собиқ президенти Хосеп Мария Бартомеу номи сир тутилаётган клуб ўз вақтида Лионель Месси учун 400 миллион евро таклиф қилганини ошкор қилди.

Бу воқеа 2017 йили Неймар ПСЖга 222 миллион еврога трансфер қилинганидан кейин юз берган. Неймарнинг Париж клубига ўтиши барча даврларнинг энг қиммат трансфери сифатида рекорд ўрнатган.

- Бир жамоа Неймар кетганидан кейин Месси учун 400 миллион евро тўлаш таклифини берган эди. Қайси клуб эканини айтмоқчи эмасман, аммо бу “Манчестер Сити” эмас.

Кейин биз Лео ва унинг отаси билан бу ҳақда гаплашдик, товон пулини янада оширишимиз керак эди, - деди Бартомеу.

Тарихдан маълумки, 400 миллион евролик трансфер амалга ошмаган. Лионель Месси 2021 йили Каталонияни тарк этиб, фаолиятини “Пари сен-Жермен”да давом эттирган. Каталонияликларнинг кейинги президенти Жоан Лапорта Мессига берилган янги шартномани қайтиб олган эди.