"Металлург" бош директори Шавкат Саидов Стешевичнинг кетиши, қандай мураббий зарурлиги ва Бабаян ҳақида

Куни кеча “Металлург” клубида бош мураббий кетди. Жамоада ишлаган черногориялик Веско Стешевич истеъфога чиқди. Албатта, бундан хабардорсиз. “Металлург” клуби бош директори Шавкат Саидов клубда юз берган ушбу ўзгариш юзасидан Sports.uz сайтига интервью берди.

- Суперлигада бу йил “Металлург” ҳали ғалаба қозона олгани йўқ. Ушбу ҳолат бош мураббийнинг ишдан кетишида асосий факторми ёки бундан бошқа сабаби ҳам борми?

- Ҳаммамизни фикримиз бўйича, у ёмон мураббий эмас. Ўзига яраша билими ва тажрибаси бор. Ўтган йили буни исботлаб берган. Ўйин мазмуни бўйича ҳам ҳар бир жамоага яхшигина қаршилик кўрсатди. Бу йилги мавсумда асосан биргаликда селекция ишларини олиб бордик. Яхши даражада тайёргарлик бўлди. Хабарингиз бор, Туркияда ҳам тайёргарлик кўрдик. Ҳужум чизиғида муаммолар яққол кўринди. Статистикага таянсангиз ҳам бу ҳол кўриниб турибди. Ўйин бобида кўпчиликка ютқазганимиз йўқ. 10 та ўйиннинг 60 фоизида дуранг ўйнадик. Шундан 3 тасида ютганимизда ҳозир умуман бошқа жойда бўлардик. Натижалардан ва руҳиятдан келиб чиқиб мураббийни ўзи аввалроқ, ОКМК билан ўйиндан кейин мурожаат қилганди. Кейин “Бунёдкор” билан учрашувдан сўнг ўзимиз ҳам тушуниб етдик. “Металлург” барқарор клуб ҳисобланади. Шароитлар жойида, ҳеч қанақа қарздорлик йўқ. Таркибда ротациялар ҳам бўлди. Гол уриш муаммоси билинди. Неъматжонов ва Ўринбоев жароҳат сабабли таркибда йўқлиги учун ҳужумларни самарали якунлай олмаётгандик. Натижада Стешевични ўзи иккинчи маротаба мурожаат қилиб, клуб манфаатини юқори ўринга қўйиб балки мен кетсам омад келар, деган маънода мурожаат қилди ва биз раҳбарият билан келишган ҳолда унга жавоб бердик. Албатта, Вескога миннатдорчилигимизни билдирамиз. У ажойиб инсон ва мураббий. Ўз ишининг устаси. Фақатгина омад етишмади холос. Дўстона хайрлашдик.

- “Металлург”ни ким бошқаради? Янги мураббий масаласида номзодлар борми?

- Турнир жадвалидан келиб чиқиб айтадиган бўлсам, охирги икки ҳафтада учта ўйинимиз бор. “Сурхон”, “Насаф” ва “Олимпик”. Янги мураббийлар бўйича энди ишни бошлаймиз. Аммо ҳозирги пайтда бирор-бир мураббий келиб ёрдам бера олади, деб айта олмайман. Сабаби, тайёргарлигимизга ҳам вақтимиз камроқ. Маҳаллий мураббий Илёс Қурбоновга топшириқ бердик. “Сурхон” билан учрашувга жамоани у тайёрлайди. Биласиз, бизни академиямиз бор. Шу боис кейинчалик ёшлар ҳамда тажрибали футболчилар билан ишлайдиган мураббийни қидирамиз. Янгилик бўлса хабар берамиз.

- “Металлург”ни бунгача хорижлик мутахассислар бошқаришди. Стешевич билан Эрнандес мисол. Иккинчи даврада жамоани яна чет эллик мураббийга топширасизларми ёки маҳаллий мураббийгами?

- Маҳаллий мураббийга ҳам, хорижлик мураббийга ҳам имконият беришимиз мумкин. Ҳаммаси чуқур ўйланиб, таҳлил қилиб чиққанимиздан сўнг аниқ бўлади. Кўпроқ ёшлар билан ишлай оладиган мураббийларга эътибор қаратмоқчимиз. Академиямиздан чиқаётган болалар ўтган йили Ўзбекистон U19 чемпионатида чемпион бўлишди. Бу йил эса ўша чемпион бўлганлар U21 жамоамизга ўтишди. Натижа бўлмаса ҳам яхши ҳаракат қилишяпти. Аста-секин академиямиз тарбияланувчиларига таянамиз. Шунинг учун академия тарбияланувчиларига таяниб ишлайдиган мутахассисларга мурожаат қилмоқчимиз.

- Яқинда эшитиб қолдим: “Металлург”да янги лойиҳалар пайдо бўлаётгани ва бу Самвел Бабаян билан боғлиқ эканлиги хусусидаги гап-сўзлар қулоққа чалинди. Бу қанчалик ҳақиқат?

- Самвел Бабаянга ҳурматим баланд. Кўп йиллик тажрибали менежер ва мураббий. Топ мураббийлар билан ишлаб юқори мақсадлар қўйилса хурсанд бўламиз. Лекин бугунги кунда бундай гап-сўзларга асос кўрмаяпмиз. Мабодо, шунақа таклифлар бўлса биз бундан хурсанд бўламиз.

- Яқинда легионер ҳужумчи билан шартнома бекор қилинди. Таркибда яна қанақа ўзгаришлар бўлиши мумкин?

- Дарвозабонлар ўз ўрнида. Ҳимоя чизиғимизда тажрибали ва ёш моҳир ўйинчилар бор. Ярим ҳимояда ҳам худди шундай. Ҳужумда оқсаш сезиляпти. Неъматжонов билан Ўринбоевни тикланиш жараёни тезлашса балки ҳужумчига ҳам ҳожат қолмас. Учта ўйинни ўтказиб олганимиздан кейин позицияларни яна кўриб чиқамиз ва керакли позицияларни кучайтирамиз.

Шуҳратбек Жўраев.