"Милан" бош мураббийи Суперкубокдаги "Интер"дан учралган шармандали мағлубиятга қандай изоҳ берди?

Саудия Арабистонининг "Ар-Риёд" шаҳрида Италия Суперкубоги учун ўйин бўлиб ўтди. Унда "Интер" азалий рақиби "Милан" устидан 3:0 ҳисобида зафар қучди. Беллашувдан кейин "россонерилар" бош мураббийи Стефано Пиоли қуйидаги фикрларни билдириб ўтди.

"Биринчи бўлимда вазиятни ўнглай олмадик ва жуда кўп хатоларга йўл қўйдик. Иккинчи тайм бошида барчасини ўзгартиришга ҳаракат қилдик, аммо қўлимиздан келмади.

Бундай кучли рақибга қарши учрашувларда кичик хатолар ҳам панд бериб қўяди. Ҳозир руҳий жиҳатдан ўзимизнинг энг яхши ҳолатимизда эмасмиз, лекин яхшиланишимиз керак. Олдимизда биргина йўл бор: ўз устимизда кўпроқ ишлаш.

Бу аламли мағлубият бўлди, совринни қўлга киритишни истагандик. Бироқ мавсум давом этмоқда. Биз ўз ўйинимизни яна топиб олишимиз лозим"-деди 57 ёшли мутахассис.