"Милан" ва "Ювентус" Гирассига қизиқиш билдирмоқда

Инсайдер Жанлука Ди Марцио дортмунднинг "Боруссия" клуби ҳужумчиси Серу Гирассининг Италия А серияси грандларидан бирига ўтиши эҳтимолини баҳолади.

Унинг фикрича, "Милан" гвинеялик ҳужумчига қизиқиш билдириши мумкин. Миланликлар январь ойида Жан-Филип Матета билан шартнома имзолай олмаганидан кейин яна бир марказий ҳужумчи қидириши кутилмоқда.

"Менимча, “Милан” унга эътибор қаратиши мумкин, чунки улар яна бир ҳужумчи олишни режалаштирмоқда. Гирасси вариантлардан бири бўлиши мумкин. У “Боруссия”га ўтишидан олдин ҳам “Милан” билан боғланганди ва клуб уни жуда ёқтирган", — деди Ди Марцио.

Шунингдек, "Ювентус" ҳам вазиятга қараб Гирассига мурожаат қилиши мумкин. Бу эса туринликлар ҳужумчиси Душан Влаховичнинг келажагига боғлиқ. Айни пайтда футболчининг вакиллари клуб билан янги шартнома бўйича музокаралар олиб бормоқда. Агар келишув узайтирилмаса, Гирасси "Ювентус" учун ҳам вариантга айланиши мумкин.