Милич - Жиру, муаллиф - Маматказин, меъмор - Соҳибжонов, муҳандис - Кумиков ёхуд "Бобур Арена"да нималар бўлди?

Про лиганинг 12-тур баҳслари ҳам якунланди. Амалдаги пешқадам “Турон” ўз уйида “Бухоро”ни 2:0 ҳисобида таслим қилди. Суперлига учун яна бир асосий даъвогар – “Андижон” эса “Бобур Арена”да “Хоразм” устидан 2:1 ҳисобида устун келди.

Бу йилги про лига янги даражага кўтарилганини бир неча бор таъкидладик ва бунга ўйинлар мобайнида бошқалар ҳам гувоҳ бўлишмоқда. Жуда қизиқарли ва интригага бой чемпионат. Бунинг яна бир сабабларидан бири албатта “Uzreport” ҳамда “Futbol TV” телеканаллари орқали про лига ўйинларининг жонли равишда эфирга узатилаётгани ҳам муҳим факторлардан бири бўлиб хизмат қиляпти. У ердаги энг моҳир шарҳловчиларнинг шарҳлари эса табиийки, ўйинга қўшимча завқ бағишлаяпти. Натижада про лига Суперлигадан трансляция ва жозиба бўйича асло қолишмаяпти.

12-турда про лигада ҳали кузатилмаган воқеа содир бўлди. “Андижон” футбол клуби матбуот хизматининг ташаббуси билан илк бор Хайрулла Ҳамидов ҳамда Даврон Файзиев тандемидаги шарҳга гувоҳ бўлдик. Ўзбекистоннинг икки энг кўзга кўринган шарҳ усталари шу кунга қадар ҳали про лига учрашувини биргаликда шарҳламагандилар. Илгари Суперлигада уларнинг тандеми кузатилганми-йўқми, очиғи, ҳозир ёдимизда йўқ. Лекин Файзиев билан Ҳамидовнинг бевосита “Бобур Арена”да ўйинни жонли равишда шарҳлаганликлари ҳам нафақат “Андижон” клуби, балки про лиганинг мавқеи ўсиб бораётганидан дарак беради.

Бунгача Хайрулла Ҳамидов “Андижон” иштирокидаги беллашувларни бир неча бор стадионда шарҳлаб келаётганди. Бу сафар Даврон Файзиев билан биргаликда стадионга ташрифи кутилганидек мухлисларда жуда катта қизиқиш уйғотди. Шу боисдан “Андижон” – “Хоразм” учрашувидан аввал улар “Бобур Арена”да стадионга йиғилган мухлислар билан саломлашди. Про лига, “Андижон” клуби ва унинг ишқибозларига самимий тилакларини билдирдилар.

Виктор Кумиков ўйиндан кейинги матбуот анжуманида жамоасининг ҳатто 5:0 ҳисобида ҳам ютиши мумкинлигин айтди. Унинг бу фикрига қўшиламиз. Кўрган бўлсангиз, “Андижон”да кўплаб голга тортадиган қулай имкониятлар яратилди. Лекин улардан фақат иккитасидангина фойдаланишди холос. Ўтказиб юборилган гол эса мезбонларнинг хатосидан кейин бўлди. “Хоразм”нинг камерунлик легионери Роки Марчиано кутилмаган совғадан фойдаланди. Бир сўз билан айтганда, яхши ўйин бўлди. Мухлислар эса ўз услубида фаоллик кўрсатишди ҳамда навбатдаги янги баннерларини кўз-кўз қилган ҳолда яна бир янгиликка қўл урдилар.

“Андижон” кўзга кўринган жамоа бўлгани сабабли бошқа мутахассислар ҳам бу клубнинг ўйинини ўрганади. Кўпчилик жамоанинг хавфли нуқтаси сифатида стандартларини эътироф этади. Бу рост, “Андижон” стандартлар қиролига айланди. Бу борада “Бургутлар” жуда хавфли. Жарима зарбалари ёки бурчак зарбаларидан фойдаланиш ҳам аслида бир тажриба. Айниқса, жарима майдони ичида “Андижон” футболчиларидан хавфлироғи бўлмайди. Лекин “Хоразм” билан учрашувда шуни ҳам кўрдикки, мезбонлар нафақат стандартлар, балки комбинациялар, қисқа пас узатишлар ва албатта ўйинчиларнинг дриблинглари эвазига ҳам чиройли ҳужумлар ва имкониятлар яратганига гувоҳ бўлдик. Демак, “Андижон” жамоавий ўйин сифатида янада кучли рақибга айланяпти.

Яна бир гап: анчадан бери гол ура олмай келаётган черногориялик Богдан Милич ниҳоят бу сафар майдонни голсиз тарк этмади. Олдинлари ўйини қовушмаётганди, бу сафар ҳаммаси бошқача бўлди. У биринчи бўлимнинг 33-дақиқасида шундай гол урдики, шубҳасиз йилнинг энг чиройли голига даъвогарлар қаторидан жой олади. Гўё, Милич ўша голи орқали олдинги камчиликларини ювиб юборгандек бўлди. Қанотдан Абдураҳмон Комиловнинг узатган пасини Милич рақиб таъқибида бўлишига қарамай, оёқлари орасидан тўпни ўтказиб товони билан дарвозанинг бурчагига йўллади. Даврон Файзиев буни фантастик гол дея баҳолади. Шунингдек, шарҳ давомида Богданнинг ушбу голига ўзгача реакция билдиришди ва Богданни франциялик жаҳон чемпиони Оливье Жируга қиёсладилар. Бўйи, ташқи кўриниши, боши билан яхши ўйнай олиши ҳамда чиройли гол уриши борасида иккаласида ўхшашликларни пайқадилар.

Иккинчи гол 50-дақиқада Илдар Маматказиннинг ҳисобига ёзилди. Бу голни яратилишида Фарҳод Соҳибжоновнинг меҳнати катта бўлди. Уни жарима майдони ичида ҳимоячилар икки марта йиқитишди, бироқ Фарҳод ўрнидан туриб курашни давом эттирди ва голли зарбани йўллади. Фақат қайтган тўпни Илдар Маматказин дарвозага йўллади. Бу вазиятда Илдарга ҳам қойил қолиш керак. Ўзи марказий ҳимоячи бўлса-да, қандай қилиб ўша вазиятда ўша ерда пайдо бўлиб қолганига ҳайрон қолдик. Даврон Файзиев билан Хайрулла Ҳамидов эса иккинчи голга шундай таъриф бердилар: “Муаллиф - Маматказин, меъмор - Соҳибжонов, муҳандис - Кумиков”.

Шунингдек, ЎзПФЛ бош директори Диёр Имомхўжаев ҳам ўйинни телеэкран қаршисида жонли равишда кузатиб бораётганини билдирган ҳолда дарҳол иккинчи голга муносабат билдириб, Соҳибжоновни майдонга ётиб олмасдан курашни давом эттирганига юқори баҳо берди.

Хуллас, бу ерда шунақа ўйинлар, азизлар! “Андижон” эса ҳар томонлама про лигага завқ бағишлаяпти.