Миллатлар Лигаси. Англия, Португалия ва Бельгия иштирокидаги учрашувлар учун превью

Миллатлар Лигасида бурилиш нуқтаси келмоқда. Гуруҳ босқичи типидаги мусобақаларнинг 4-тури жуда кўп саволларга жавоб бўлиб келган. Бугунги ўйинлар билан 4-тур баҳслари якунланади. Миллатлар Лигасида гуруҳдан 1-ўрин эгасигина кейинги босқичга йўл олади. 

Англия ва Бельгия жой олган гуруҳда плей-офф йўлланмаси учун кураш энг сўнгги тургача давом этиши маълум бўлиб улгурди. Аммо ундан аввалги учрашувларда очко йўқотмасдан сўнгги турга етиб олиш масаласи ҳам бор. “Уч шерлар” 5-турга ғалабали ўйин орқали етиб олган тақдирда Бельгия билан анча хотиржам ўйнаши мумкин бўлади. 

Португалия эса Швецияга қарши беллашувда Роналдусиз ҳаракат қилиши маълум бўлиб улгурди. Криштианунинг вирус юқтириб олиши футбол мухлисларини бошқа жиҳатдан хавотирга қўймоқда: у “Барселона”га қарши Чемпионлар Лигаси баҳсигача сафга қайта оладими? Биз икки даҳо ўртасидаги тўқнашувларнинг биттасидан маҳрум бўламизми? Буни энди вақт кўрсатади. Биз Миллатлар Лигаси ўйинлари ҳақида сўз юритишни бошлашимиз лозим.

Англия - Дания

Англия

Инглизларнинг Бельгия устидан ғалаба қозонган учрашувини ҳам жуда кўп мутахассислар танқид остига олишди. Бунга етарли сабаблар мавжуд эди. Пенальти ва Маунтнинг мўжизавий голи эвазига ғалаба қозонган Саутгейт шогирдлари ўша учрашувни ўйин жиҳатидан рақибларига бой беришди. Тан олиш лозимки, Бельгия ўша куни жуда ақлли ўйин намойиш этди. Тўп, асосан, инглизларда бўлгани билан “қизил иблислар”нинг қарши ҳужумлари ғоят хавфли кўриниш олди. Ҳисобни очгунича ҳам улар гол уришни уддалаганди, аммо ҳакамлар инобатга олмади. Хуллас, ушбу ғалаба кўнгилдагидек қўлга киритилмади, Англия ўйинидаги муаммолар кўзга ташланиб қолди. 

Бундай ҳолатда Данияга қарши учрашувда очко йўқотилмаслигига на Саутгейт ва на бошқалар кафолат бера олмайди. 

Тахминий таркиб: Пикфорд, Арнольд, Чилуэлл, Магуайр, Гомез, Райс, Хендерсон, Санчо, Стерлинг, Грилиш, Кейн.

Гарет Саутгейт: “Бельгияга қарши баҳснинг асосий қисмида яккакурашларда мағлубиятга учрадик. Атиги 20 дақиқа мобайнида ўзимиз хоҳлаган ўйинни намойиш эта олдик. Доим рақибдан қандайдир даражадаги ўйинларни кутиш қийин масала. Биз қолган барча жиҳатларга қарамай, гуруҳда етакчилик қилмоқдамиз. Шу билан бирга, ҳеч ким ўз даражасидан юқори ўйнамаётганини таъкидлашга мажбурман. Миллатлар Лигасининг ажойиб томони шундаки, 16 та энг зўр жамоа унда иштирок этади. Ҳар бир беллашувда фақат энг яхшилари ўзаро рақобатга киришади. Биз ярим финалга чиқишни чин дилдан хоҳласак, Данияни енгишимиз шарт”

Дания

Хюлманн жамоаси олдига А лигада қолиш вазифаси қўйилгани кўриниб турибди. Барчаси шунга қараб кетмоқда ҳам. Англия ва Бельгия билан плей-офф йўлланмаси учун курашишга скандинавияликларда имконият деярли мавжуд эмас. Бу таркиб жиҳатидан чиқарилган хулосалар. Аслида, гуруҳдаги вазиятдан келиб чиқадиган бўлсак, бунинг иложи бор. Қолган барча учрашувларда ғалаба қозонган тақдирда, Дания гуруҳни бемалол 1-поғонада якунлаши мумкин. Бунинг учун етарлича кўп юқори сифатли футболчилар мавжуд. Ҳа, гуруҳ фаворитлариники сингари кўп эмас. Бироқ яхши шаклланган услуб билан ушбу футболчилар ижросида кўплаб марраларни забт этиш мумкин.

Тахминий таркиб: Шмейхель, Васс, Кьер, Кристенсен, Сков, Хёйбьерг, Дилейни; Поулсен, Эриксен, Брейтуэйт, Долберг.

Каспер Хюлманн: “Сентябрдаги баҳс жуда ёпиқ тарзда ўтганди. Мавсум олдидан тайёргарлик ўйинларида мана шундай ҳолатлар учраб туради, бу гал барчаси бошқача бўлади. Биз очиқроқ ўйин кўрамиз, деб ўйлайман. Бизда фақат Мартин Брейтуэйт кетма-кет баҳсларда тўлиқ ҳаракат қилмоқда. Қолган барча футболчиларга етарлича дам бериляпти. Мен бемалол ўйинни Исландияни енгган таркиб билан бошлашим мумкин, ўзгартиришлар қилишим эҳтимоли ҳам мавжуд”.

Португалия - Швеция

Португалия

Роналдунинг коронавирусга чалингани бутун футбол жамоатчилиги учун ёмон янгилик. Ҳа, албатта, рақиблар ва уларнинг мухлислари учун бу қайсидир маънода, хушхабар бўлиши мумкин. Рубен Олсен ўтган учрашувда ўтказиб юборган голларидан сўнг, Криштианунинг майдонга тушмаслигини чин дилдан сўраган бўлиши ҳам мумкин. Бироқ нима бўлган тақдирда ҳам, португалиялик мегаюлдуз иштирокидаги ҳар қандай учрашувни ўтказиб юбормаслик  бизнинг келажак авлод олдидаги вазифамиздир.

Ўйинга келадиган бўлсак, Португалия Францияга қарши беллашувда жуда эҳтиёткор футбол намойиш этди. Жаҳон чемпионларидан ҳам деярли бир хил жавоб гувоҳи бўлдик. Аммо Сантуш жамоаси ўз етакчисисиз ҳам Швецияни енгишга қодир. Таркибга назар солсак, ҳар бир чизиқда кучли футболчилар борлигини кўрамиз. 

Тахминий таркиб: Патрисиу, Семеду, Пепе, Диаш, Геррейру, Фернандеш, Перейра, Карвальо, Силва, Фелиш, Жота.

Фернанду Сантуш: "Роналдусиз ҳам режа ўзгармайди. Бироқ табиийки, динамикада бироз бошқача усуллардан фойдаланишга мажбур бўламиз. Қўл остимдаги жамоа муҳим палларда суянишим мумкинлигини исботлаб бўлган. Шу сабабдан, таркибдаги барча футболчиларга тўлиқ ишонч билдира оламан. Сўнгги йилларда Португалия барчага исталган мусобақада ғалаба учун кураша олишини кўрсатиб қўйди. Биз ҳар бир ўйинга энг сўнггиси каби ёндашамиз, хоҳ у жаҳон чемпионлари, хоҳ бошқаси".

Швеция

Кўпчилик учун кутилмаган ҳолат бўлиши мумкин, аммо Швеция Португалияга қарши кечган 19 та баҳснинг 7 тасида зафар қучган. Португалларда эса муваффақиятли ўйинлар сони 6 тага етган, холос. Яна шунча баҳс дуранг билан якунланган. Бу ерда Златан эрасининг салмоқли хизмати бор. 

Роналдунинг йўқлиги Португалия учун у қадар катта йўқотиш эмаслигини яна бир бор таъкидлашга тайёрман. Лекин бу швецияликлар учун мисли кўрилмаган руҳий босимдан қутулмоқликни англатади. 

Андерссон шогирдларида А лигада қолиш имконияти жуда паст. Швециядек жамоанинг юқори дивизионда ўйнашини барча хоҳлайди. Аммо кимнинг ўрнига? Португалия? Франция ёки Хорватия? “Ўлим гуруҳи”га тушиб қолган шведларга раҳминг келмай илож йўқ. 

Тахминий таркиб: Олсен, Лустиг, Янссон, Линделёф, Аугустинссон, Кулусевски, Олссон, Экдал, Форсберг, Исак, Берг.

Янн Андерссон: “Фикримча, Хорватияга 1:2 ҳисобида мағлуб бўлишдан ҳам ёмонроқ ҳолатдамиз. Мағлубиятга учрар экансан, ўзинг хоҳлаган поғонада турмайсан. Бу албатта, бизнинг таъбимизни хира қиладиган ҳолат. Аммо, ўз навбатида, ижобий томонларини ҳам кўра билишимиз лозим. Ўзимиз ўйнаган ўйинларни таҳлил қилиб, кўп нарсаларни ўзгартиришимиз мумкин”.

Исландия - Бельгия

Исландия

Бу гал етакчилари йиғинга жалб қилингани сабабли ўйини яхшиланишидан умид қилганимиз - Исландияда вазият умуман ўзгармади. Жамоа Данияга қарши беллашувда ўз дарвозасидан жавобсиз 3 та тўп олиб чиқди. 

Очиғини айтадиган бўлсак, бу каби ўйин билан Б лигада ҳам осон ўйин ўтказа олмайди. Қуйи лигада элитага чиқиш учун шу қадар жиддий кураш кечмоқдаки, исландларнинг ушбу босимга, рақобатга бардош бериши қийинроқдек кўринмоқда. 

Тахминий таркиб: Халдорссон, Палссон, Арнасон, Сигурдсон, Магнусон, Гудмунсон, Гуннарсон, Бьярнасон, Траустасон, Финбогасон, Сигурдссон.

Эрик Хамрен: “Биз 6 кун ичида 3 та қийин баҳсда майдонга тушдик. Барчаси тактик ва руҳий жиҳатдан кучли бўлишни талаб этади. Таркибимдаги барча футболчиларга ушбу беллашувларда имкон беришга ҳаракат қилдим. Бу иш мен кутганимдан ҳам қийинроқ бўлдими? Миллатлар Лигасидаги ҳеч бир рақиб осон эмас ва улардан очко олиш доим қийин кечади”. 

Бельгия

Англиянинг ғалабали ўйини етарлича танқид остига олинди. Аммо шундай яхши ҳаракатлари билан ҳам мағлубиятга учраган Бельгия ҳақида нима дейиш мумкин. Аввало, қанот ҳимоячиларини олқишлаб қўйиш керак, деган бўлардим. Бу ерда киноя йўқ, Менье ва Кастань лотераль қанот ҳимоячиси позициясида жуда ажойиб ҳаракат қилишмоқда. Айниқса, Тимотининг ўйинлари эътиборни тортмоқда. Клуб миқёсида ҳам “Лестер”га жуда кўп фойда келтиряпти. Менье эса ўз дарвозасига жуда кераксиз пайтда пенальти келтириб, кўпчиликни ранжитди. Аммо ўша кунги ўйинини умумий ҳолатда ёмон деб бўлмасди. 

Де Брюйненинг ўйинидан эса, шахсан, қониқмадим. У жамоаси учун кўпроғини яратиб бериши лозим эди. Карраско маълум вақтларда фаол бўлгани билан, тез-тез йўқолиб қолди. 

Исландияга қарши ўйинда кўпчилик футболчиларнинг диққатини жамлаш ҳам қийин кечади. Сабаби, уларни бир неча кундан сўнг, клублари билан навбатдаги тур баҳслари кутиб турибди. Балки, Мартинес вазият изн берса, бироз тежамкор футболга мурожаат этиши эҳтимоли ҳам бор. 

Тахминий таркиб: Миньоле, Дендонкер, Денайер, Бойата, Менье, Тилеманс, Вицель, Кастань, Троссард, Лукаку, Карраско.

Роберто Мартинес: "Биз Англияга қарши баҳсда биринчи бўлимни жуда яхши ўтказдик. Аммо иккинчи тайм ҳақида бундай дея олмайман. Барча кўрди, бизда ғалаба қозониш учун етарлича имкониятлар юзага келди. Бундай шароитда ва аҳволда мағлубиятни қабул қилиш - шармандалик".

Хулоса ўрнида

Ушбу беллашувларнинг барчаси параллел тарзда бўлиб ўтиши бироз кўнгилни хира қилмоқда. Устига-устак, юқорида тилга олган учрашувларимиз куннинг марказий беллашувлари қаторига кирмайди. Энг муҳим беллашувларга одатимизга кўра, бирма-бир тўхталиб ўтамиз.

Бельгия ва Португалия ўз учрашувларини у қадар катта қийинчиликка учрамасдан ютишлари кутилмоқда. Сабаби, рақиблар юқори даражада эмас. Аммо Англия - Дания баҳси томошабоп ўтишини тахмин қилишимиз мумкин. Бу ҳақида юқорида данияликлар мураббийи ҳам гапириб ўтди. 

Дарвоқе, бугун 23:45 да бўлиб ўтадиган беллашувлар билан терма жамоалар футболи яна бир ойга бизни тарк этади. Шундай экан, ундан завқланиб қолишга ҳаракат қилинг. Олдинда сизларни энг марказий беллашувлар учун превьюлар кутиб турибди.

Абдулвосид Валихонов тайёрлади