Миржалол Қосимов: Майдон сифати қийинчилик туғдирди

Coca Cola Суперлига 16-туридан ўрин олган "Бунёдкор" - АГМК (2:3) баҳсидан сўнг, олмалиқликлар устози Миржалол Қосимов матбуот анжуманида иштирок этди.

- Бугун бизга ҳам, "Бунёдкор" учун ҳам муҳим ўйин эди. Учрашувни ёмон бошламадик, аммо иккинчи 25 дақиқаликда ўйин тизгинини йўқотдик. Натижада ўз дарвозамиздан тўп олиб чиқдик. Дарвозабоннинг хатоси бизда ҳам, рақибда ҳам кўзга ташланиб турган эди. Ишончли ўйин кўрсатишмаётган эди. 

Иккинчи бўлимда хатодан унумли фойдаландик. Рақиб ҳужумга ўтган пайтда бир нечта қулай вазиятга эга бўлдик ва якунда Умаровнинг голи эвазига ғалаба қозондик. Майдон сифати бироз қийинчилик туғдирди. 

Албатта, селекция ишлари бўляпти, кузатяпмиз. Бу фақатгина бизга боғлиқ бўлган жиҳат эмас. Ёшларга ҳам имкон берамиз. Бугун ҳам Сардор Абдунабиев таркибга жалб этилди. Яхши ўйинчиларни қаердан олиш керак? Бу ҳам муаммо. "Бавария"нинг таркиби ҳам ёш эмас, лекин жамоа 8:0 ҳисобида ғалаба қозонмоқда. Лекин, клуб тарихи, академияси ҳам бор", - деди Қосимов.