ММА бўйича жаҳон чемпионидан ёш спортчиларимизга ўзига хос тавсиялар...

Ҳозирги кунда бутунжаҳонда глобал муаммога айланган коронавирус пандемиясини  олдини олиш ва бартараф этиш борасида мамлакатимизда улкан ишлар амалга оширилмоқда. Жумладан, юртимизда  карантин ҳолати ҳам жорий қилинди...

Мазкур даврда ёш спортчиларимиз ўз савияларини ошириб боришлари учун қандай ишларни амалга ошириши кераклиги борасида Ўзбекистон ММА оламининг байроқдори, “панкратион” йўналишда жаҳон чемпиони, ҳозирги кунда Ўзбекистон профессионал ММА терма жамоаси бош мураббийи Суннат Ильясовга бир-иккита савол билан мурожаат қилдик. Ушбу мутахассис ёш спортчиларимизга ўзига хос маслаҳатлар берди.

- Суннат ака айни кундаги карантин ҳолатида ёш спортчиларимиз савиясини ошириб бориш учун қандай ишларни амалга ошириш керак?

- Биринчидан, уй шароитида имкон қадар, машғулотлар олиб бориши лозим. Қолаверса, бу борада назарий билимларини ҳам мустаҳқамлаши спортчига катта фойда беради.

- Демак, спортда назарий билмнинг ҳам ўрни катта эканда?

- Беқиёс...

- Назарий билимларини ошириш учун сиз қандай маслаҳатлар берган бўлардингиз?

- Спортга оид асарлар, психология, фалсафа, умуман олганда китоб ўқишни, ёшига мос тарздаги чемпионлик йўлида босиб ўтилган қийинчиликлардан қўрқмай, уни енгиб ўтганлиги акс эттирилган фильмларни кўришни тавсия қилардим.

- Масалан?

- Арнольд Шварцнеггернинг “Чемпионнинг маслаҳатлари”, Жей Жейкобсни “Ўлимга қадар соғлом”, Евгений Ильинни “Спорт психологияси” каби китобларни ўқишларини таъкидлаган бўлардим. Шунингдек, Шайх Муҳаммад Содиқ Муҳаммад Юсуф ҳазратларининг “Мукаммал саодат йўли” асаридан ҳам кўп тарбиявий жиҳатларни ўзлаштириш мумкин. Спортда барибир тартиб-интизом биринчи ўринда туради.

- Юқорида фильмлар кўришни ҳам тавсия қилгандингиз?

- Албатта, “Барча нарсани ўзгартирган инсон” фильмини айтган бўлардим. Унинг қисқача мазмуни математика фани дунёдаги энг машҳур спорт лигасини қандай ўзгартирганлигини акс эттиради. Қолаверса, “Етти ҳаёт”, моҳияти саҳийлик ва меҳр-оқибатдан иборат. Яна “Али” фильмида енгиб ўтилган қийинчиликлар ва ажойиб боксчи бўлиш йўлини ҳикоя қилади.

Бир сўз билан айтганда, муваффақият калити бу – инсоннинг бўш вақтини унумли ўтказишидир. Ва яна қайтариб айтаманки, ёшларимиз илм ўрганиш, спорт билан мунтазам шуғулланиш орқали етук инсон бўлиб етишади.

Шу ўринда нафақат ёшлар, балки бутун халқимизга карантин қоидаларига тўла риоя қилишлари орқали биз учун жон куйдираётган ҳукумат раҳбарлари, шифокорлар, борингки барча масъулиятни бўйнига олаётган касб эгаларига яқиндан ёрдам беришларини сўраб қолган бўлардим.