Нури Шаҳин гол урган Шомуродов ва Файзуллаевнинг ўйинини баҳолади

Туркия Суперлигасининг 14-турида бўлиб ўтган "Истанбул Башакшехир" – "Касимпаша" (3:1) учрашувида Ўзбекистон миллий терма жамоаси аъзолари Элдор Шомуродов ва Аббосбек Файзуллаев гол киритди. Беллашувдан кейин жамоа бош мураббийи Нури Шаҳин гол муаллифлари ҳақида фикр билдирди.

"Шомуродов яхши футболчи бўлиши билан бирга, бунчалик камтар бўлиши жуда ажойиб. Унда ҳеч қандай юлдузлик аломатлари йўқ. Нима десак, бажаришга ҳаракат қилади ва жуда профессионал.

Ёзда жамоамизга келиб қўшилган Аббосбек Файзуллаев ва Амине Ҳарит учун янги мамлакатга мослашиш осон бўлмади. Файзуллаев ҳамда Ҳаритнинг имкониятларини яхши биламиз. Шунинг учун бу икки футболчи “Башакшехир”да ўйнамоқда. Иккаласи ҳам биз учун жуда қадрли. Улар ҳар лаҳзада ўйин тақдирини ўзгартириши мумкин бўлган футболчилар ҳисобланади. Бугун ҳам ғалаба қўлга киритишимизда катта ҳисса қўшишди.

Аббос жароҳат олганидан сўнг учрашувларни ўтказиб юборди. Қишки танаффусга келиб, у ўзининг юқори даражасига қайтади", — деди мураббий.