Morata A Seriyaga qaytishi mumkin

32 yoshli tajribali forvard Alvaro Morata yana Italiyada to‘p sura boshlashi mumkin. Mashhur insayder Fabritsio Romanoning ma’lum qilishicha, A Seriyaning "Komo" klubi ispaniyalik hujumchiga rasman taklif yo‘llagan va hozirda muzokaralar boshlangan.

Hozirda Morata Turkiyaning "Galatasaray" klubi sharafini himoya qilmoqda. U shu yilning fevral oyi boshida "Milan"dan bir yillik ijara asosida turk klubiga ko‘chib o‘tgandi. Shartnomada uni to‘liq xarid qilish imkoniyati ham mavjud.

Qiziqarlisi shundaki, "Komo" jamoasining bosh murabbiyi — sobiq yulduz futbolchi Sesk Fabregas hisoblanadi. Jamoa o‘tgan mavsumni A Seriyada 10-o‘rin bilan yakunlagan edi.

Transfermarkt portali Fabregas boshqarayotgan jamoani 11 million evro atrofida baholamoqda.

Agar transfer amalga oshsa, Morata Italiya futboliga navbatdagi qaytishi bilan yana xabar markazida bo‘ladi. U avvalroq "Yuventus" va "Milan" klublarida ham harakat qilgan edi.