Морган Рожерс учун кураш қизимоқда: "Бавария" ҳам даъвогарлар сафида

"Астон Вилла" вингери Морган Рожерс ёзги трансфер ойнаси олдидан Европанинг йирик клублари диққат марказига айланди. "The Times Sport" маълумотига кўра, 23 ёшли англиялик ҳужумчига бир қатор топ жамоалар жиддий қизиқиш билдирмоқда.

Манбага кўра, Мюнхеннинг "Бавария" клуби ҳам футболчини кузатаётган жамоалар қаторига қўшилган. Немис гранди Рожерс учун "Арсенал", "Челси", "Манчестер Юнайтед" ва ПСЖ билан рақобатга кириши мумкин. Бу эса ёзда катта трансфер курашини юзага келтириши кутилмоқда.

Ҳозирда "Астон Вилла" ўз етакчиларидан бири бўлган футболчини камида 80 миллион евро атрофида баҳоламоқда. Унинг клуб билан амалдаги шартномаси 2031 йилнинг июнь ойи охиригача мўлжаллангани боис, харидорлар катта маблағни тайёр қилишига тўғри келади.

Жорий Англия Премьер-лигаси мавсумида Рожерс 31 та учрашувда майдонга тушиб, 8 та гол ва 5 та голли узатма муаллифи бўлди. Унинг барқарор ўйини ва универсаллиги топ клублар қизиқишини янада кучайтирмоқда.