Моуриньо: Беллингем энди бошқача ўйнайсан!

Англия терма жамоаси сафида жаҳон чемпионатида муваффақиятли иштирок этган ярим ҳимоячи Жуд Беллингем таътилдан сўнг Мадриднинг “Реал” жамоаси ихтиёрига қайтди.

Diario AS маълумотига кўра, “Реал”нинг янги бош мураббийи Жозе Моуриньо англиялик футболчидан 4-2-3-1 тактик схемасида “ўнлик” позициясида фойдаланишни режалаштирмоқда.

Португалиялик мутахассис Беллингем зарурат туғилганда майдоннинг чуқурроқ қисмида ҳам ўйнай олишини яхши тушунади, аммо унинг фикрича, ярим ҳимоячи айнан рақиб жарима майдони олдида энг самарали ҳаракат қилади.

Ўтган мавсумда 23 ёшли Беллингем барча мусобақаларда 40 та ўйинда қатнашиб, саккизта гол урди ва бешта голли узатмани амалга оширди.

“Реал” янги мавсумдаги биринчи расмий ўйинини 22 август куни меҳмонда “Эспаньол”га қарши ўтказади.