Мурод Отажонов "Бунёдкор" бош мураббийи бўлганидан кейин: "Уйга қайтиш ҳамиша ёқимли"

Тошкентнинг “Бунёдкор” клуби ҳам бошқа жамоаларимиз қатори Туркиянинг Анталия шаҳрида ўқув-машғулот йиғинини ўтказиб келмоқда. Жамоада ўзгаришлар юз берганидан хабардорсиз. Эндиликда бош мураббий сифатида Мурод Отажонов ишга киришди.

Бу мураббий илгари ҳам “Бунёдкор”да ишлаган ва жамоани жуда яхши билади. Куни кеча Отажонов Анталияда Sports.uz сайти учун ўз фикрлари билан ўртоқлашди.

- Ҳозирги йиғинимизда жисмоний тайёргарликка эътибор қаратяпмиз, - дея гап бошлади, бош мураббий. - Албатта, техник ва тактик жиҳатлар устида ҳам ишлаяпмиз. Жисмоний тайёргарлигимизни Туркияда имкон қадар яхшилишга ҳаракат қиляпмиз. Анталиядан қайтганимиздан кейин чемпионат бошланишига икки ҳафтача вақт қолади. Тошкентда қандайдир ўзгаришлар бўлиб қолса, тўғрилаб олишга ҳаракат қиламиз.

- “Бунёдкор” клуби бош мураббийлиги сизга топширилди. Бу қандай содир бўлди? Кутганмидингиз?

- Тўғриси, кутилмаганда таклиф бўлиб қолди. Уйга қайтиш ҳамиша ёқимли. Бу нарсалар мен учун унчалик қийин эмас. Кўп йиллардан бери “Бунёдкор” структурасида ишлаб келдик. Кўп футболчилар ва мураббийларни танийман. Анчаси мени қўлимда ўйнашган ва ишлашган. Ҳа, Суперлигада анчадан бери ишламаётгандим. Лекин боя айтганимдек, клуб структурасида ишлаганман ва биламан.

- Таркибга Дониёр Абдуманнопов билан Шохруҳ Абдураҳмонов қўшилди. Уларни кўндириш қандай кечди?

- Сир эмаски, ёшроқ футболчиларни ҳам таклиф қиляпмиз. Абдуманнопов ўзимиздан чиққан бола. Уни ва бошқаларни шуғуллантирган мураббийларимиз ҳам олдинги йигитларимизни йиғсак, деган таклифни айтишди. Булар Суперлигада тўп суришган ва унинг муҳитини билишади. Дониёр билан ҳам гаплашдик ва бир-биримизни тушундик. Ҳозир шартнома бўйича ҳаракатдамиз. Шохруҳ Абдураҳмонов охирги пайтларда Беларусь чемпионатида “Энергетик-БГУ” сафида тўп сурди. У ердан келганидан сўнг ярим йил Самарқанднинг “Динамо” жамоасида ижара ҳисобида фаолият олиб борди. Шохруҳ ҳам ўзимизни футболни яхши билади. Футболчилар билан келишув яхши ўтди. Абдураҳмонов “Бунёдкор”га ёрдам бериш учун бор имкониятини ишга солишга тайёр.

- Яна кимлар қўшилиши мумкин?

- 2-3 та йигитлар бор. Музокаралар давом этяпти. Баъзилар тайёр шартнома сўрашади. Агентлар билан гаплашяпмиз. Кўрамиз, нима бўларкин?

- “Бунёдкор”да бош мураббий сифатида ишга киришишингизни янги чақирув десак бўлади. Клубнинг асосий вазифаси нимадан иборат?

- Албатта, ҳамиша яхши натижа кўрсатиш, академиямиз тарбияланувчиларига кўпроқ эътибор қаратиш ва шу орқали олдинга яна бир қадам ташлаш ниятимиз бор. Ўзимизга ишонмасак бу таклифни қабул қилмасдик. Таркибда яхши-яхши футболчилар йиғилган. Шу ўйинчилар билан ижобий натижаларга эришмоқчимиз.

Шуҳратбек Жўраев.