MYu golli vaziyatlardan foydalanish borasida juda yomon ko‘rsatgich qayd etmoqda

"Manchester Yunayted" mavsum boshida vaziyatlarni golga aylantirish borasida jiddiy qiyinchilikka duch kelmoqda. Erik ten Xag shogirdlari kecha bo‘lib o‘tgan APL doirasidagi "Kristal Pelas"ga qarshi o‘yinda (0:0) 3 ochko ololmadi, garchi ularda gol urish uchun imkoniyatlar etarli bo‘lgan bo‘lsa ham.

WhoScored ma’lumotlariga ko‘ra, "Manchester Yunayted" hozirda top-5 ligadagi barcha jamoalar orasida golli vaziyatlar yaratish bo‘yicha uchinchi o‘rinda. Biroq "qizil iblislar" joriy mavsum hozircha bor-yo‘g‘i besh marta raqib darvozasini ishg‘ol etishga muvaffaq bo‘ldi xolos. Bu borada mankunianliklardan faqatgina “Sautgempton” va “Kalyari” yomonroq ko‘rsatgichga ega.

“Manchester Yunayted” ortda qolgan besh tur yakunlari bo‘yicha 7 ochko jamg‘argan holda APL musobaqa jadvalida 11-o‘rinda bormoqda.