Наҳотки!? "Динамо" "Бунёдкор"ни атиги бир марта мағлуб эта олган

Суперлига 17-турининг эътиборли учрашувларидан бири Самарқандда "Динамо" ҳамда "Бунёдкор" жамоалари ўртасида бўлиб ўтади.

Мазкур клублар миллий биринчилигимиз тарихида ўзаро бугунгача 23 марта тўқнаш келган. Бугунги ўйин 24-тўқнашув сифатида тарихда қолади.

Ўзаро учрашувлар тарихи статистикаси "Бунёдкор" устунлигини кўрсатмоқда. Тошкентликлар 19 та ўйинда ғолиб бўлган, 3 та ўйин дуранг ҳисобида якунланган. "Динамо" ушбу рақибни ҳозиргача бир марта мағлуб этган – 2014 йилда Тошкентда Азамат Бобожоновнинг 90+4-дақиқада киритган голи эвазига. Самарқандда эса ҳозирча мағлуб эта олмаган.

Тўплар нисбатида ҳам устунлик "Бунёдкор" томонида - 46:13. Ўзаро ўйинларда "Динамо" 6, "қалдирғочлар" эса 60 очкони қўлга киритган.
пойтахт клубининг ўзаро ўйинларда қозонган энг йирик ғалабаси – 4:0 га тенг. Самарқандликларнинг ягона ғалабаси – 1:0.

Маълумот ўрнида, "Динамо" жамоаси Суперлига 16-туридан кейин 7 очко жамғарган ҳолда 14-ўринни эгаллаб турибди. "Бунёдкор" эса 17 очко жамғарган ҳолда турнир жадвалида 9-ўринни эгаллаб турибди.