“Навбаҳор” сезиларли фарқ билан олдинда…

14 апрель – 17 апрель кунлари Суперлигада 6-тур баҳслари ўтказилди. Натижалар билан сайтимиз орқали хабар бериб бордик.

Ушбу турда бир қатор қизиқарли ўйинлар, ўзига хос қарама-қаршиликлар кузатилди. 

“Навбаҳор” ўз уйидаги “Андижон”га қарши водий дербисида қийин ғалабага эришди. “Сурхон” “Қизилқум” билан ўйинда дуранг қайд этди. “Сўғдиёна” бир киши кам бўлиб қолган “Пахтакор”дан енгилди. “Олимпик” Тошкентда “Бухоро”ни таслим этди. Улуғбек Бақоев қаторасига 2-баҳсда мағлубиятга учради.

“Металлург” ўрганиб қолган Тошкент вилояти дербисида ОКМКдан 3 очко олди. Олмалиқликлар эса “анъанани” давом эттириб бу беллашувда ҳам қизил карточка ишлади. “Нефтчи” бош мураббийсиз қолган “Турон”ни юта олмади.

“Бунёдкор” анча шовқинли ўтган ўйиннинг охирида гол уриб, мағлубиятдан қутилиб қолди…

Энди эса турга оид қизиқарли маълумотларни тақдим этамиз. Яъни анъанамизга содиқ қолган ҳолда тур мухлислари статистикаси билан таништирамиз.

6-турда стадионларимизга жами 33079 томошабин ташриф буюрди. Бу ҳар бир беллашувга ўртача 4726ни ташкил қилади.

Энг кўп мухлис Наманганда. “Марказий” аренадаги “Навбаҳор” - “Андижон” ўртасидаги водий дербисини 16250 томошабин стадиондан кузатди. Водийдаги яна бир дерби - “Нефтчи” - “Турон” учрашувига 5345 ишқибоз ташриф буюрди.

Турнинг марказий баҳси “Бунёдкор” – “Насаф” қарама-қаршилигини 3203 ишқибоз аренадан томоша қилди. Эътиборга молик томони, Тошкент вилояти дербисига бу беллашувдан кўра кўпроқ мухлис келди - 4582.

Энг кам томошабин Тошкентда. “Олимпик”нинг “Бухоро” устидан қозонган ғалабасини 286 киши стадиондан кузатди холос.

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

“Навбаҳор” - “Андижон” 1:0. 16250 томошабин

“Нефтчи” - “Турон” 1:1. 5345 томошабин

“Металлург” - ОКМК 2:0. 4582 томошабин

“Бунёдкор” - “Насаф” 1:1. 3203 томошабин

“Қизилқум” - “Сурхон” 0:0. 2331 томошабин

“Пахтакор” - “Сўғдиёна” 2:1. 1082 томошабин

“Олимпик” - “Бухоро” 1:0. 286 томошабин